തിരുവനന്തപുരം: കാര്യവട്ടം അന്താരാഷ്ട്ര സ്റ്റേഡിയത്തില് മഴ ഒരിക്കല് കൂടി വില്ലനായെത്തിയെങ്കിലും ദക്ഷിണാഫ്രിക്ക എക്കെതിരായ മൂന്നാം ഏകദിനത്തിലും ഇന്ത്യ എ വിജയം സ്വന്തമാക്കി. മഴ കാരണം 30 ഓവറാക്കി ചുരുക്കിയ മത്സരത്തില് ആദ്യം ബാറ്റ് ചെയ്ത ദക്ഷിണാഫ്രിക്ക 8 വിക്കറ്റ് നഷ്ടത്തില് 207 റണ്സെടുത്തു. എന്നാല് 13 പന്ത് ശേഷിക്കേ 6 വിക്കറ്റ് നഷ്ടത്തില് ഇന്ത്യ ലക്ഷ്യം കണ്ടു.
ഇന്ത്യയുടെ മുന്നിര ബാറ്റ്സ്മാന്മാര്ക്ക് നിലയുറപ്പിക്കാനാകാതെ പോയ മത്സരത്തില് മധ്യനിരയില് നായകന് മനീഷ് പാണ്ഡെയുടെ പ്രകടനമാണ് നിര്ണ്ണായകമായത്. 3 ബൗണ്ടറിയും 5 സിക്സറുകളുമുള്പ്പെടെ 59 പന്തില് മനീഷ് പാണ്ഡെ 81 റണ്സെടുത്തു. ഇഷാന് കിഷന് 40 റണ്സെടുത്തപ്പോള് ശിവം ഡൂബെ 28 പന്തില് നേടിയ 45 റണ്സ് ഇന്ത്യയെ അതിവേഗം വിജയത്തിലെത്തിച്ചു.
നേരത്തെ, മധ്യനിരയിലെ ഹെന്റിച്ച് ക്ലാസന്റെ വെടിക്കെട്ട് ബാറ്റിംഗാണ് ദക്ഷിണാഫ്രിക്കക്ക് മികച്ച സ്കോര് സമ്മാനിച്ചത്. നാല് സിക്സറുകളും രണ്ട് ബൗണ്ടറികളുമടക്കം ക്ലാസന് 21 പന്തില് നേടിയത് 44 റണ്സ്. ഓപ്പണര് ജാനെമാന് മലന് (37), മാത്യു ബ്രീറ്റ്സ്കെ (36), ടെംബ ബവുമ (27) എന്നിവരുടെ പ്രകടനവും ദക്ഷിണാഫ്രിക്കന് ബാറ്റിംഗില് നിര്ണ്ണായകമായി.
ഇന്ത്യക്കു വേണ്ടി ദീപക് ചഹര്, ക്രുനാല് പാണ്ഡ്യ എന്നിവര് രണ്ട് വിക്കറ്റ് വീതവും ഷര്ദുല് ഠാക്കൂര്, യുസ്വേന്ദ്ര ചഹല് എന്നിവര് ഓരോ വിക്കറ്റ് വീതവും സ്വന്തമാക്കി. ജയത്തോടെ 5 മത്സര പരമ്പരയില് ഇന്ത്യ 3-0ന് മുന്നിലെത്തി.
