കൊളംബോ: പാകിസ്ഥാനില് നടക്കാനിരിക്കുന്ന ഏകദിന-ടെസ്റ്റ് പരമ്പരയില് നിന്ന് പത്ത് ശ്രീലങ്കന് താരങ്ങള് പിന്മാറി. സുരക്ഷ കണക്കിലെടുത്താണ് താരങ്ങള് പരമ്പരയില് നിന്ന് പിന്മാറിയത്. ട്വന്റി20 നായകന് ലസിത് മലിംഗ, മുന് നായകന് ആഞ്ചലോ മാത്യൂസ് എന്നിവരുള്പ്പെടെയുള്ളവരാണ് പാകിസ്ഥാനിലേക്ക് പോകാന് വിസമ്മതമറിയിച്ചിരിക്കുന്നത്.
കളിക്കാര് പാകിസ്ഥാനിലേക്ക് പോകുന്ന കാര്യത്തില് തീരുമാനമെടുക്കാന് താരങ്ങള്ക്ക് പൂര്ണ്ണ സ്വാതന്ത്ര്യം നല്കിയതായി ശ്രീലങ്കന് ക്രിക്കറ്റ് ബോര്ഡ് പ്രസ്താവനയിലൂടെ അറിയിച്ചു. സെപ്റ്റംബര് 27ന് കറാച്ചിയില് ആരംഭിക്കാനിരിക്കുന്ന പരമ്പരയില് മൂന്ന് വീതം ഏകദിന മത്സരങ്ങളും ട്വന്റി20യുമാണ് നിശ്ചയിച്ചിരുന്നത്. ദൈര്ഘ്യമേറിയ ടെസ്റ്റ് മത്സരങ്ങള് പാകിസ്ഥാനു പുറത്ത് വെച്ച് നടത്തിയാല് മതിയെന്ന് ശ്രീലങ്കന് കായിക മന്ത്രി ഹരിന് ഫെര്നാണ്ടോ നേരത്തെ നിര്ദ്ദേശിച്ചിരുന്നു.
2009ല് പാകിസ്ഥാനില് ടെസ്റ്റ് പരമ്പരക്കെത്തിയ ശ്രീലങ്കന് ടീമിന് നേരെ ഭീകരാക്രമണമുണ്ടായിരുന്നു. ശ്രീലങ്കന് താരങ്ങള് സഞ്ചരിച്ചിരുന്ന ബസിന് നേരെയാണ് ആക്രമണമുണ്ടായത്. എന്നാല് ഇതിനു ശേഷം മറ്റു ടീമുകളൊന്നും തന്നെ പാകിസ്ഥാനില് കളിക്കാന് തയ്യാറായിരുന്നില്ല.
നിരോഷന് ഡിക്വെല്ല, കുശാല് പെരേര, ധനഞ്ജയ ഡി സില്വ, അഖില ധനഞ്ജയ, സുറംഗ ലക്മല്, ദിനേഷ് ചണ്ഡിമാല്, ദിമുത് കരുണരത്നെ എന്നിവരാണ് പാകിസ്ഥാനില് കളിക്കാന് വിസമ്മതിച്ച മറ്റ് ശ്രീലങ്കന് താരങ്ങള്. എന്നാല് ഇതോടെ ക്രിക്കറ്റിനെ തങ്ങളുടെ രാജ്യത്തേക്ക് തിരികെ കൊണ്ടുവരാനുള്ള പാകിസ്ഥാന്റെ ശ്രമവും വിഫലമായിരിക്കുകയാണ്.
