റാഞ്ചി: ദക്ഷിണാഫ്രിക്കക്കെതിരായ മൂന്നാം ടെസ്റ്റിന്റെ തുടക്കത്തിലേറ്റ പ്രഹരത്തില്‍ നിന്നും കരകയറി ഇന്ത്യ. ഓപ്പണര്‍ രോഹിത് ശര്‍മ്മയുടെ അപരാജിത സെഞ്ച്വറിയാണ് ഇന്ത്യയെ കൂട്ടത്തകര്‍ച്ചയില്‍ നിന്നും പിടിച്ചു നിര്‍ത്തിയത്. ദക്ഷിണാഫ്രിക്കക്കെതിരായ പരമ്പരയിലെ മൂന്നാമത്തെ സെഞ്ച്വറിയാണ് രോഹിത് റാഞ്ചിയില്‍ കുറിച്ചത്.
നേരത്തെ, 39 റണ്‍സെടുക്കുന്നതിനിടയില്‍ ഇന്ത്യക്ക് മൂന്ന് വിക്കറ്റുകള്‍ നഷ്ടമായിരുന്നു. ഓപ്പണര്‍ മായങ്ക് അഗര്‍വാളിന്റെ (10) വിക്കറ്റാണ് ഇന്ത്യക്ക് ആദ്യം നഷ്ടമായത്. തൊട്ടുപിന്നാലെ റണ്‍സൊന്നുമെടുക്കാതെ പൂജാരയും മടങ്ങിയതോടെ ഇന്ത്യ പ്രതിരോധത്തിലായി. നായകന്‍ വിരാട് കോഹ്‌ലി 12 റണ്‍സുമായി പുറത്തായതോടെ ഇന്ത്യന്‍ ഇന്നിംഗ്‌സിന്റെ ചുമതല രോഹിത് സ്വയം ഏറ്റെടുക്കുകയായിരുന്നു.
കോഹ്‌ലിക്കു പിന്നാലെ ക്രീസിലെത്തിയ അജിങ്ക്യ രഹാനെ രോഹിത്തിന് മികച്ച പിന്തുണ നല്‍കിയതോടെ ഇന്ത്യ മത്സരത്തിലേക്ക് തിരിച്ചുവന്നു. ഇതിനിടെ രോഹിത് സെഞ്ച്വറി തികച്ചു. 130 പന്തില്‍ നിന്നാണ് രോഹിത് പരമ്പരയിലെ മൂന്നാമത്തെയും കരിയറിലെ ആറാമത്തെയും സെഞ്ച്വറി കുറിച്ചത്. പിഡിറ്റിന്റെ പന്തില്‍ സിക്‌സര്‍ അടിച്ചാണ് രോഹിത് സെഞ്ച്വറി ആഘോഷമാക്കിയത്.
ഒടുവില്‍ വിവരം ലഭിക്കുമ്പോള്‍ ഇന്ത്യ 58 ഓവറില്‍ 3 വിക്കറ്റ് നഷ്ടത്തില്‍ 224 റണ്‍സെന്ന നിലയിലാണ്. 164 പന്തില്‍ 117 റണ്‍സുമായി രോഹിത്തും 135 പന്തില്‍ 83 റണ്‍ലുമായി രഹാനെയുമാണ് ക്രീസില്‍. നിലവില്‍ വെളിച്ചക്കുറവ് മൂലം മത്സരം നിര്‍ത്തിവെച്ചിരിക്കുകയാണ്.
