മുംബൈ: മുന്‍ ഇന്ത്യന്‍ താരവും മലയാളിയുമായി അഭിഷേക് നായര്‍ ഫസ്റ്റ് ക്ലാസ് ക്രിക്കറ്റില്‍ നിന്നും വിരമിച്ചു. ആഭ്യന്തര ക്രിക്കറ്റില്‍ മുംബൈ ടീമിലെ സ്ഥിരം സാന്നിദ്ധ്യമായിരുന്നു 36കാരനായ ഈ ഇടം കൈയ്യന്‍ ബാറ്റ്‌സമാന്‍. ഇന്ത്യന്‍ പ്രീമിയര്‍ ലീഗില്‍ മുംബൈ ഇന്ത്യന്‍സ്, കിംഗ്‌സ് ഇലവന്‍ പഞ്ചാബ്, പൂനെ വാരിയേഴ്‌സ്, രാജസ്ഥാന്‍ റോയല്‍സ് എന്നീ ടീമുകളില്‍ കളിച്ചിട്ടുണ്ടെങ്കിലും വെറും മൂന്ന് മത്സരങ്ങളില്‍ മാത്രമാണ് അഭിഷേക് ഇന്ത്യന്‍ ജഴ്‌സിയണിഞ്ഞത്.
2013ലെ ഐപിഎല്ലില്‍ ഏറ്റവും വിലയേറിയ ഇന്ത്യന്‍ താരമായിരുന്നു അഭിഷേക്. അന്ന് മൂന്നരക്കോടി രൂപക്കാണ് പൂനെ അഭിഷേകിനെ സ്വന്തമാക്കിയത്. ഉന്മുക്ത് ചന്ദ്, ദിനേശ് കാര്‍ത്തിക്, ശ്രേയസ് അയ്യര്‍ തുടങ്ങിയ ഇന്ത്യന്‍ താരങ്ങളുടെ മെന്ററായിരുന്ന അദ്ദേഹം അടുത്ത സീസണില്‍ കൊല്‍ക്കത്ത നൈറ്റ് റൈഡേഴ്‌സിന്റെ സഹ പരിശീലകനാണ്.
ഫസ്റ്റ് ക്ലാസ് ക്രിക്കറ്റില്‍ 103 മത്സരങ്ങള്‍ കളിച്ചിട്ടുള്ള താരം 45.62 ശരാശരിയില്‍ 5749 റണ്‍സ് നേടിയിട്ടുണ്ട്. 259 റണ്‍സാണ് ഉയര്‍ന്ന സ്‌കോര്‍. ബൗളിംഗിലും ബാറ്റിംഗിലും ഒരുപോലെ തിളങ്ങിയ അഭിഷേക് ഫസ്റ്റ് ക്ലാസ് ക്രിക്കറ്റില്‍ 173 വിക്കറ്റുകളാണ് സ്വന്തമാക്കിയത്. 131 റണ്‍സ് വഴങ്ങി 7 വിക്കറ്റ് നേടിയതാണ് കരിയറിലെ മികച്ച പ്രകടനം.
ഒറ്റപ്പാലം സ്വദേശി മോഹന്‍ നായരുടെയും തിരുവനന്തപുരം വട്ടിയൂര്‍ക്കാവ് ലക്ഷ്മി മന്ദിരത്തില്‍ ലേഖയുടെയും മകനാണ് അഭിഷേക്.
