കളിക്കാര്‍ക്ക് കുടിവെള്ളവുമായെത്തി; കായിക ലോകത്തെ ഞെട്ടിച്ച് ഓസ്‌ട്രേലിയന്‍ പ്രധാനമന്ത്രി

കാന്‍ബറ: ഓസ്‌ട്രേലിയന്‍ കളിക്കാരെയും ക്രിക്കറ്റ് ആരാധകരേയും ഒരുപോലെ ഞെട്ടിച്ച ഓസ്‌ട്രേലിയന്‍ പ്രധാനമന്ത്രിയാണ് ഇന്ന് സമൂഹ മാദ്ധ്യമങ്ങളിലെ ചര്‍ച്ചാ വിഷയം. ഞായറാഴ്ച ആരംഭിക്കുന്ന ശ്രീലങ്ക-ഓസ്‌ട്രേലിയ ട്വന്റി20 പരമ്പരക്ക് മുന്നോടിയായി നടന്ന സന്നാഹ മത്സരത്തിലാണ് രസകരമായ സംഭവമുണ്ടായിരിക്കുന്നത്.

പ്രൈമിനിസ്റ്റേഴ്‌സ് ഇലവനും ശ്രീലങ്കയും തമ്മില്‍ നടന്ന മത്സരത്തിനിടെ കളിക്കാര്‍ക്ക് കുടിവെള്ളവുമായി ഗ്രൗണ്ടിലെത്തിയ ആളെ കണ്ട് ഏവരും അമ്പരന്നു. ഓസ്‌ട്രേലിയന്‍ പ്രധാനമന്ത്രി സ്‌കോട്ട് മോറിസണാണ് ഗ്രൗണ്ടില്‍ തന്റെ കളിക്കാര്‍ക്ക് കുടിക്കാന്‍ വെള്ളവുമായെത്തിയത്. കളിക്കാരും കാണികളും അദ്ദേഹത്തെ കൈയ്യടികളോടെയാണ് വരവേറ്റത്. നിമിഷങ്ങള്‍ക്കകം തന്നെ സംഭവം സമൂഹമാദ്ധ്യമങ്ങളില്‍ വൈറലായി.

How cool that the Prime Minister @ScottMorrisonMP comes out with the drinks at the Prime Minister's XI game in Canberra pic.twitter.com/tZzobUqivr

— Harsha Bhogle (@bhogleharsha) October 24, 2019

മത്സരത്തില്‍ പ്രൈംമിനിസ്റ്റേഴ്‌സ് ഇലവന്‍ ഒരു വിക്കറ്റിന് വിജയിച്ചു. ആദ്യം ബാറ്റ് ചെയ്ത ശ്രീലങ്ക നിശ്ചിത 20 ഓവറില്‍ 8 വിക്കറ്റ് നഷ്ടത്തില്‍ 130 റണ്‍സെടുത്തപ്പോള്‍ മറുപടി ബാറ്റിംഗില്‍ 9 വിക്കറ്റുകള്‍ നഷ്ടമായെങ്കിലും പ്രൈംമിനിസ്റ്റേഴ്‌സ് ഇലവന്‍ മത്സരം വിജയിച്ചു. 50 പന്തില്‍ 79 റണ്‍സെടുത്ത ഹാരി നീല്‍സനാണ് ടോപ് സ്‌കോറര്‍.