ഇടുക്കി: നെടുങ്കണ്ടം കസ്റ്റഡി കൊലപാതക കേസില് പൊലീസിനെതിരെ വിമര്ശനവുമായി ജുഡീഷ്യല് കമ്മീഷന്. ഉദ്യോഗസ്ഥര് അന്വേഷണവുമായി സഹകരിക്കുന്നില്ലെന്നാണ് കമ്മീഷന്റെ വിമര്ശനം. നെടുങ്കണ്ടം കസ്റ്റഡി മരണവുമായി ബന്ധപ്പെട്ട രേഖകള് ക്രൈംബ്രാഞ്ച് ഇതുവരെ കമ്മീഷന് മുന്നില് ഹാജാരാക്കിയിട്ടില്ല.
രേഖകള് ഹാജരാക്കാത്തതിനെ തുടര്ന്ന് ഡിവൈഎസ്പി ജോണ്സണ് ജോസഫിനെ വിളിച്ചു വരുത്തി കമ്മീഷന് അതൃപ്തി അറിയിക്കുകയും ചെയ്തിരുന്നു. രഹസ്യ സ്വഭാവമുള്ളതിനാല് രേഖകള് കൈമാറാന് കഴിയില്ലെന്നാണ് ക്രൈംബ്രാഞ്ച് കമ്മീഷന് നല്കിയ വിശദീകരണം.
കമ്മീഷനെതിരെ നിഷേധാത്മകമായ നിലപാടാണ് പൊലീസ് സ്വീകരിച്ചിരിക്കുന്നത്. തങ്ങള്ക്ക് നല്കാന് കഴിയാത്ത എന്ത് രഹസ്യ സ്വഭാവമാണ് രേഖകളിലുള്ളതെന്നും സഹകരിക്കാന് കഴിയില്ലെങ്കില് ജുഡീഷ്യല് കമ്മീഷന് എന്തിനാണെന്നും ജസ്റ്റിസ് നാരായണക്കുറുപ്പ് ചോദിച്ചു. ആഭ്യന്തര വകുപ്പിന്റെ നിഷേധാത്മക നിലപാട് സംസ്ഥാന സര്ക്കാരിന്റേയും ഹൈക്കോടതിയുടെയും ശ്രദ്ധയില്പ്പെടുത്താനാണ് കമ്മീഷന്റെ തീരുമാനം.
രേഖകള് ഹാജരാക്കണമെന്നാവശ്യപ്പെട്ട് തിങ്കളാഴ്ച്ച ക്രൈംബ്രാഞ്ചിന് കമ്മീഷന് വീണ്ടും കത്ത് നല്കും. നിഷേധാത്മക സമീപനം തുടരുകയാണെങ്കില് കടുത്ത നടപടികളിലേക്ക് കടക്കാനാണ് കമ്മീഷന് തീരുമാനിച്ചിരിക്കുന്നത്.