ന്യൂഡല്‍ഹി: രാജ്യാന്തര ട്വന്റി20 ക്രിക്കറ്റിലെ മികച്ച ബാറ്റ്‌സ്മാന്‍ ആരെന്ന ചോദ്യത്തിന് ഉത്തരമാകാനുള്ള വാശിയേറിയ മത്സരമാണ് ഇന്ത്യന്‍ നായകന്‍ വിരാട് കോഹ്‌ലിയും ഓപ്പണര്‍ രോഹിത് ശര്‍മ്മയും തമ്മില്‍ നടക്കുന്നത്. കരിയറിലെ മികച്ച ഫോമില്‍ ഇരുവരും ബാറ്റ് വീശുമ്പോള്‍ ക്രിക്കറ്റ് ചരിത്രത്തിലെ നിരവധി റെക്കോര്‍ഡുകളാണ് സമീപകാലത്ത് തകര്‍ത്തെറിയപ്പെട്ടത്. എന്നാല്‍ ട്വന്റി20 ക്രിക്കറ്റില്‍ ഏറ്റവും കൂടുതല്‍ റണ്‍സ് നേടിയ താരമെന്ന റെക്കോര്‍ഡ് സ്വന്തമാക്കാന്‍ ഒരുങ്ങുകയാണ് രോഹിത് ശര്‍മ്മ.
നിലവില്‍ വിരാട് കോഹ്‌ലിയുടെ പേരിലുള്ള റെക്കോര്‍ഡിന് വെറും 8 റണ്‍സ് മാത്രം അകലെ രണ്ടാം സ്ഥാനത്താണ് ഹിറ്റ്മാന്‍. ബംഗ്ലാദേശിനെതിരായ പരമ്പരയില്‍ കോഹ്‌ലിക്ക് വിശ്രമം അനുവദിച്ചതോടെ രോഹിത് റെക്കോര്‍ഡിനോട് ഒരുപടി കൂടി അടുത്തിരിക്കുകയാണ്. ഡല്‍ഹിയില്‍ നടക്കാനിരിക്കുന്ന ആദ്യ ട്വന്റി20യില്‍ തന്നെ രോഹിത് ചരിത്ര നേട്ടം സ്വന്തമാക്കുമെന്ന പ്രതീക്ഷയിലാണ് ആരാധകര്‍.
67 ഇന്നിംഗ്‌സുകളില്‍ നിന്ന് 2450 റണ്‍സ് നേടിയ വിരാട് കോഹ്‌ലിക്ക് തൊട്ടുപിന്നില്‍ രണ്ടാം സ്ഥാനത്താണ് രോഹിത്തിന്റെ സ്ഥാനം. 90 ഇന്നിംഗ്‌സുകളില്‍ നിന്നും 2443 റണ്‍സാണ് രോഹിത് ശര്‍മ്മയുടെ സമ്പാദ്യം. 76 ഇന്നിംഗ്‌സുകളില്‍ നിന്നും 2285 റണ്‍സ് നേടിയ ന്യൂസിലന്‍ഡ് താരം മാര്‍ട്ടിന്‍ ഗപ്റ്റിലാണ് മൂന്നാമത്.
