മസ്‌ക്കറ്റ് : ലോകക്കപ്പ് ഫുട്‌ബോള്‍ യോഗ്യത നേടാന്‍ പേടിക്കാതെ കളിക്കണമെന്ന ഉപദേശവുമായി ഇന്ത്യന്‍ കോച്ച് ഇഗര്‍ സ്‌ററിമാച്ച്. ഒമാനെതിരെ തോല്‍വി ഏറ്റുവാങ്ങിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
‘ഏതു ടീമിനോടും പേടിയില്ലാതെ കളിക്കുന്ന ഇന്ത്യന്‍ നിരയെയാണ് എനിക്കാവശ്യം. എതിരാളി ആരുമായിക്കൊള്ളട്ടെ ഏതുകളിയിലും നിങ്ങള്‍ക്ക് ജയിക്കാനുള്ള സാധ്യതയുണ്ട്. ആ അവസരം കൈക്കലാക്കുകയാണ് വേണ്ടത്’ ഇഗര്‍ പറഞ്ഞു.
‘എതിരാളികളെ നോക്കി കളിമാറ്റുകയെന്നാല്‍ അതിനര്‍ത്ഥം നമ്മള്‍ ദുര്‍ബലരാണെന്നാണ്. അത് നാം തിരിച്ചറിയണം. നമ്മുടെ താരങ്ങളുടെ കഴിവനുസരിച്ചുള്ള തന്ത്രങ്ങളും കളിമികവുമാണ് നാം തയ്യാറാക്കുന്നതും കളിക്കുന്നതും, അത് മാറ്റരുത്.’ ഇഗര്‍ വ്യക്തമാക്കി.
ഏഷ്യന്‍ യോഗ്യതാ റൗണ്ടില്‍ ഏകപക്ഷീയമായ ഒരു ഗോളിനാണ് ഇന്ത്യ ഒമാനോട് തോല്‍വി വഴങ്ങിയത്.രണ്ടാം പകുതിയില്‍ മികച്ച പ്രകടനം നടത്തിയിട്ടും ഗോളടിക്കാനാകാത്തതിന്റെ കാരണം നാം മനസ്സിലാക്കണമെന്നും ഇഗര്‍ പറഞ്ഞു. ഒമാന് വേണ്ടി ആദ്യപകുതിയുടെ 33-ാം മിനിറ്റിലാണ് മുഹ്‌സിന്‍ ഖസാനി ഒമാന്റെ ഗോള്‍ നേടിയത്.
എതിര്‍ ഭാഗത്തേക്ക് അതിവേഗം മുന്നേറാന്‍ നമുക്കറിയാം. എന്നാല്‍ ബോക്‌സിനടുത്തെത്തുമ്പഴേക്കും തീരുമാനങ്ങള്‍ പാളുന്നു. കൃത്യതയും നഷ്ടമാകുന്നു. ഇഗര്‍ വിലയിരുത്തി.
നിലവില്‍ ഒരു ജയവും ഒരു സമനിലയും രണ്ടു തോല്‍വിയുമടക്കം ആകെ 3 പോയിന്റുകള്‍മാത്രമാണ് ഇന്ത്യക്കുള്ളത്. 13 പോയിന്റുകളോടെ ഖത്തറാണ് ഈ-ഗ്രൂപ്പില്‍ മുന്നില്‍. ഇന്ത്യ നാലാംസ്ഥാനത്താണ്. ബംഗ്ലാദേശാണ് ഗ്രൂപ്പിലെ അവസാനസ്ഥാനക്കാര്‍.
