കൊല്ക്കത്ത: കൊല്ക്കത്ത നഗരത്തിന്റെ മുഖമുദ്രയായിരുന്ന മഞ്ഞ ടാക്സികള് പിന്വാങ്ങുന്നു. ഓണ് ലൈന് ടാക്സികള് കളത്തില് നിറഞ്ഞതോടെയാണ് പിന്വാങ്ങാന് മഞ്ഞ അംബാസിഡര് ടാക്സികള് തയ്യാറായത്.
എണ്പതുകള് അംബാസിഡര് കാറുകളുടെ രാജകീയ കാലമായിരുന്നു. മഞ്ഞനിറത്തിലുള്ള അംബാസിഡര് കാറുകള് നിലവില് ഇരുപതിനായിരത്തില് താഴെ മാത്രമാണ് ഉള്ളത്. അംബാസിഡര് കാറിന്റെ നിര്മാതാക്കളായ ഹിന്ദുസ്ഥാന് മോട്ടോഴ്സ് കമ്പനി പൂട്ടിയതാണ് മഞ്ഞടാക്സികളുടെ എണ്ണത്തില് ഗണ്യമായ കുറവ് വരാന് കാരണമായത്.
എങ്കിലും ഇന്നും ടാക്സി ഓടിച്ച് ജീവിക്കുന്ന ആയിരങ്ങള് കൊല്ക്കത്ത നഗരത്തിലുണ്ട്. ബംഗാളികള്ക്ക് മാത്രമല്ല, അയല് സംസ്ഥാനങ്ങളില് നിന്ന് കൊല്ക്കത്തയിലെത്തിയവര്ക്കും മഞ്ഞടാക്സി ഉപജീവനമാര്ഗമായിരുന്നു.
ഓണ്ലൈന് ടാക്സികളുടെ വരവിനൊപ്പം പ്രതാപകാലത്ത് യാത്രക്കാരോട് പരുഷമായി പെരുമാറിയിരുന്നതും മഞ്ഞ ടാക്സികളെ ജനങ്ങളില് നിന്നകറ്റി. നോ റെഫ്യൂസല് സംവിധാനം നടപ്പാക്കിയതോടെ വീണ്ടും മഞ്ഞ ടാക്സികള് ജനങ്ങള് ഉപയോഗിച്ചു തുടങ്ങി. കാലതാമസം കൂടാതെ മഞ്ഞടാക്സികള് പൂര്ണമായും കൊല്ക്കത്തയില് നിന്ന് പിന്വാങ്ങും.