കൊല്‍ക്കത്ത: ബംഗ്ലാദേശിനെതിരായ പരമ്പരയും തൂത്തുവാരിയതോടെ ലോക ടെസ്റ്റ് ക്രിക്കറ്റ് ചാമ്പ്യന്‍ഷിപ്പില്‍ ഇന്ത്യ ഒന്നാം സ്ഥാനത്ത് കുതിക്കുന്നു. രണ്ട് ടെസ്റ്റുകളുടെ പരമ്പര സ്വന്തമാക്കിയതോടെ 360 പോയിന്റാണ് ഇന്ത്യ നേടിയത്. ഇന്ത്യയുടെ ആദ്യ പിങ്ക് ബോള്‍ ടെസ്റ്റില്‍ ഇന്നിംഗ്‌സിനും 46 റണ്‍സിനുമാണ് ബംഗ്ലാദേശ് അടിയറവു പറഞ്ഞത്.
നേരത്തെ, വെസ്റ്റ് ഇന്‍ഡീസിനെതിരായ പരമ്പരയോടെയായിരുന്നു ഇന്ത്യ ടെസ്റ്റ് ചാമ്പ്യന്‍ഷിപ്പിന് തുടക്കം കുറിച്ചത്. രണ്ട് മത്സരങ്ങളടങ്ങിയ പരമ്പര ഇന്ത്യ 2-0നാണ് ജയിച്ചത്. ഇതിനു പിന്നാലെ ഇന്ത്യയിലെത്തിയ ദക്ഷിണാഫ്രിക്കയെയും മുട്ടുകുത്തിച്ച ഇന്ത്യ ടെസ്റ്റ് ചാമ്പ്യന്‍ഷിപ്പില്‍ ഒന്നാം സ്ഥാനത്ത് ദീര്‍ഘദൂരം മുന്നിലെത്തിയിരുന്നു. ചാമ്പ്യന്‍ഷിപ്പ് തുടങ്ങിയ ശേഷം തുടര്‍ച്ചയായി മൂന്നാം പരമ്പര വിജയമാണ് ഇന്ത്യ സ്വന്തമാക്കുന്നത്.
പാകിസ്ഥാനെതിരായ പരമ്പരയിലെ ആദ്യ മത്സരം വിജയിച്ചതോടെ 116 പോയിന്റുമായി ഓസ്‌ട്രേലിയയാണ് രണ്ടാം സ്ഥാനത്ത്. ശ്രീലങ്ക-ന്യൂസിലാന്‍ഡ് പരമ്പര സമനിലയിലായതോടെ ഇരു ടീമുകള്‍ക്കും നിലവില്‍ 60 പോയിന്റ് വീതമാണുള്ളത്. 56 പോയിന്റുമായി ഇംഗ്ലണ്ടാണ് അഞ്ചാം സ്ഥാനത്ത്.
രണ്ട് ടെസ്റ്റുകളുടെ പരമ്പരയിലെ ഓരോ മത്സരത്തിനും 60 പോയിന്റ് വീതവും അഞ്ച് ടെസ്റ്റ് പരമ്പരയിലെ ഓരോ മത്സരത്തിനും 24 പോയിന്റു പോയിന്റു വീതവുമാണുള്ളത്. 2 വര്‍ഷം നീണ്ടുനില്‍ക്കുന്ന ടൂര്‍ണമെന്റിന്റെ അവസാനം ഏറ്റവും അധികം പോയിന്റ് ലഭിക്കുന്ന രണ്ട് ടീമുകളാണ് ചാംപ്യന്‍ഷിപ്പിന്റെ കലാശപ്പോരാട്ടത്തിനിറങ്ങുക. 2021 ജൂണില്‍ ലോര്‍ഡ്സിലാണ് ഫൈനല്‍ നടത്താന്‍ തീരുമാനിച്ചിരിക്കുന്നത്.
