ന്യൂഡല്‍ഹി: ഋഷഭ് പന്തിന് ശക്തമായ മുന്നറിയിപ്പുമായി മുന്‍ ബാറ്റ്‌സ്മാന്‍ വി.വി.എസ്. ലക്ഷ്മണ്‍. ഇനിയും ടീമിന് വേണ്ടി മികച്ച പ്രകടനം നടത്തിയില്ലെങ്കില്‍ കീപ്പര്‍ സ്ഥാനം സജ്ഞു സാംസണിന് നല്‍കേണ്ടിവരുമെന്നാണ് ലക്ഷമണിന്റെ മുന്നറിയിപ്പ്.
‘വെസ്റ്റിന്‍ഡീസിനെതിരായ ടി20ക്കായി സഞ്ജുവിനെ ടീമിലെടുത്തത് ശക്തമായ സൂചനയായി പന്ത് കാണണം. സമയം ആര്‍ക്കുംവേണ്ടി കാത്തുനില്‍ക്കില്ല. ടീമിനാവശ്യമുള്ളപ്പോള്‍ മികച്ച പ്രകടനം നടത്തലാണ് വേണ്ടത്. സ്വന്തം പ്രതിഭക്കനുസരിച്ച പ്രകടനം കാഴ്ചവച്ചേ മതിയാകൂ’ ലക്ഷമണ്‍ പറഞ്ഞു.
നിരന്തരം ഫോമിലില്ലാഞ്ഞിട്ടും ടീം ധാരാളം അവസരം തന്നുകഴിഞ്ഞു. വരുന്ന ലോകകപ്പില്‍ യുവനിരയുടെ പരാജയം ധോണിയെ തന്നെ ഉപയോഗിക്കുന്നതിലേക്കാണ് കാര്യങ്ങള്‍ എത്തുന്നതെന്നും ലക്ഷ്മണ്‍ പറഞ്ഞു.
നിലവില്‍ ടെസ്റ്റില്‍ വൃദ്ധിമാന്‍ സാഹയാണ് കീപ്പര്‍ ബാറ്റ്‌സ്മാന്‍. ഏകദിനത്തിലാകട്ടെ പന്തിന്റെ പ്രകടനം ആശങ്കയുണ്ടാക്കുകയാണ്. ടി20യില്‍ ഇനി സഞ്ജുവിനാണ് സാധ്യത കൂടുതലെന്നും ലക്ഷമണ്‍ വിലയിരുത്തി.
