മുംബൈ: ഇന്ത്യന് ടീം ഏറെ നാളായി അഭിമുഖീകരിച്ചിരുന്ന പ്രശ്നത്തിന് പരിഹാരമായെന്ന് ചീഫ് സെലക്ടര് എം.എസ്.കെ പ്രസാദ്. ബാറ്റിംഗ് നിരയിലെ നാലാം നമ്പറില് കളിക്കാന് ഏറ്റവും അനുയോജ്യനായ താരത്തെ കണ്ടെത്തിയതായി അദ്ദേഹം പറഞ്ഞു. യുവതാരം ശ്രേയസ് അയ്യരാണ് ഈ പൊസിഷനില് കളിക്കാന് അനുയോജ്യനായ താരമെന്ന് പ്രസാദ് വ്യക്തമാക്കി.
കഴിഞ്ഞ രണ്ട് വര്ഷത്തെ പ്രകടനം നോക്കിയാല് ഏകദിനത്തിലും ട്വന്റി20യിലും ഒരുപോലെ നാലാം നമ്പറില് കളിക്കാന് ശ്രേയസിനു കഴിയും. 18 മാസത്തെ ഇടവേളക്ക് ശേഷം ഇന്ത്യന് ടീമില് തിരിച്ചെത്തിയ ശ്രേയസ് വെസ്റ്റിന്ഡീസീനെതിരെയും ബംഗ്ലാദേശിനെതിരെയും മികച്ച പ്രകടനമാണ് പുറത്തെടുത്തത്. ലോകകപ്പിന് മുന്പ് ഇന്ത്യക്കായി ശ്രേയസിനു കളിക്കാന് കഴിയാഞ്ഞത് നിര്ഭാഗ്യകരമായിരുന്നു എന്നും പ്രസാദ് പറഞ്ഞു.
2017ലാണ് ശ്രേയസ് അയ്യര് ഇന്ത്യക്കായി ഏകദിനത്തില് അരങ്ങേറ്റം കുറിച്ചത്. നിലവില് 9 ഏകദിന മത്സരങ്ങളില് ഇന്ത്യക്കായി കളിച്ച ശ്രേയസ് 49.42 റണ്സ് ശരാശരിയില് 346 റണ്സ് എടുത്തിട്ടുണ്ട്. ട്വന്റി20യില് 11 മത്സരങ്ങളില് നിന്ന് 212 റണ്സ് നേടിയ ശ്രേയസിന്റെ ഉയര്ന്ന സ്കോര് നാഗ്പൂരില് ബംഗ്ലാദേശിനെതിരെ നേടിയ 62 റണ്സാണ്.
