മുംബൈ: 2020ല് നടക്കാനിരിക്കുന്ന ട്വന്റി20 ലോകകപ്പിനുള്ള ഇന്ത്യന് ടീമില് മുന് നായകന് മഹേന്ദ്ര സിംഗ് ധോണിക്ക് സ്ഥാനമുണ്ടാകുമോ എന്നാണ് ക്രിക്കറ്റ് ആരാധകര് ഉറ്റു നോക്കുന്നത്. ധോണിയെപ്പോലെയുള്ള ഒരു ചാമ്പ്യന് താരത്തിന്റെ കാര്യത്തില് എടുക്കുന്ന തീരുമാനങ്ങള് എല്ലായ്പ്പോഴും പരസ്യപ്പെടുത്താനാവില്ലെന്നാണ് ബിസിസിഐ പ്രസിഡന്റ് സൗരവ് ഗാംഗുലിയുടെ നിലപാട്. ഇക്കാര്യത്തില് ഗാംഗുലിക്ക് വ്യക്തമായ ധാരണയുണ്ടെന്ന സൂചനയാണ് അദ്ദേഹത്തിന്റെ വാക്കുകളില് നിന്നും വ്യക്തമാകുന്നത്.
ധോണിയുടെ കാര്യം ധോണിയോട് തന്നെ ചോദിക്കു എന്നാണ് ഗാംഗുലി മാദ്ധ്യമപ്രവര്ത്തകരോട് ആവശ്യപ്പെട്ടത്. മൂന്ന് മാസത്തിനുള്ളില് തന്നെ ഇക്കാര്യത്തില് തീരുമാനമുണ്ടാകുമെന്നും കാര്യങ്ങളില് വ്യക്തതയുണ്ടെന്നും അദ്ദേഹം പറഞ്ഞു.
എന്നാല് അടുത്തിടെ നടന്ന ഒരു പരിപാടിയില് ധോണിയോട് വിരമിക്കല് സംബന്ധിച്ചുള്ള ചോദ്യമുയര്ന്നപ്പോള് ജനുവരി വരെ തന്നോട് ഇക്കാര്യം ചോദിക്കരുതെന്നാണ് ധോണി ആവശ്യപ്പെട്ടത്. ഇതിനു പിന്നാലെ ധോണി റാഞ്ചിയില് പരിശീലനം ആരംഭിച്ചെന്ന വാര്ത്തയും പുറത്തു വന്നിരുന്നു. ധോണി അടുത്ത ഐപിഎല്ലില് കളിക്കുമെന്നും ഇതിനു ശേഷമാകും ഭാവി കാര്യങ്ങള് തീരുമാനിക്കുമെന്നും അദ്ദേഹത്തിന്റെ അടുത്ത വൃത്തങ്ങള് സൂചിപ്പിച്ചിരുന്നു.
2019 ഐസിസി ഏകദിന ലോകകപ്പിലാണ് ധോണി അവസാനമായി നീലക്കുപ്പായം അണിഞ്ഞത്. ന്യൂസിലന്ഡിനെതിരായ സെമി ഫൈനല് മത്സരത്തിലെ പരാജയത്തിനു പിന്നാലെ അദ്ദേഹം കളിക്കളത്തില് നിന്നും വിട്ടു നില്ക്കുകയാണ്. നാട്ടില് നടന്ന വെസ്റ്റ് ഇന്ഡീസ്, ബംഗ്ലാദേശ് പരമ്പരകളില് അദ്ദേഹം കളിച്ചിരുന്നില്ല.