സൂററ്റ്: സയ്യിദ് മുഷ്താഖ് അലി ട്രോഫിയില്‍ കര്‍ണ്ണാടക ജേതാക്കള്‍. ആവേശകരമായ കലാശപ്പോരാട്ടത്തില്‍ 1 റണ്ണിനാണ് കര്‍ണ്ണാടക വിജയിച്ചത്. ഇതോടെ സയ്യിദ് മുഷ്താഖ് അലി ട്രോഫിയും വിജയ് ഹസാരെ ട്രോഫിയും കര്‍ണ്ണാടക സ്വന്തമാക്കി.
ടോസ് നഷ്ടപ്പെട്ട് ബാറ്റിംഗിനിറങ്ങിയ കര്‍ണ്ണാടക നിശ്ചിത 20 ഓവറില്‍ 5 വിക്കറ്റ് നഷ്ടത്തില്‍ 180 റണ്‍സ് നേടി. എന്നാല്‍ മറുപടി ബാറ്റിംഗില്‍ തമിഴ്‌നാടിന് 6 വിക്കറ്റ് നഷ്ടത്തില്‍ 179 റണ്‍സ് എടുക്കാനെ കഴിഞ്ഞുള്ളൂ.
കര്‍ണ്ണാടകയ്‌ക്ക് വേണ്ടി മനീഷ് പാണ്ഡെ 45 പന്തില്‍ 60 റണ്‍സ് നേടി. രോഹന്‍ കഡം (35*), ദേവ്ദത്ത് പടിക്കല്‍ (32), കെ.എല്‍ രാഹുല്‍ (22) എന്നിവരുടെ പ്രകടവനവും നിര്‍ണ്ണായകമായി. തമിഴ്‌നാടിന് വേണ്ടി ആര്‍.അശ്വിന്, മുരുകന്‍ അശ്വിന് എന്നിവര്‍ രണ്ടും വാഷിംഗ്ടണ്‍ സുന്ദര്‍ ഒരു വിക്കറ്റും സ്വന്തമാക്കി.
അവസാന ഓവറില്‍ 13 റണ്‍സായിരുന്നു തമിഴ്‌നാടിന് വിജയിക്കാന്‍ വേണ്ടിയിരുന്നത്. ആദ്യ രണ്ട് പന്തിലും ബൗണ്ടറി നേടിയ ആര്‍.അശ്വിന് തമിഴ്‌നാടിന് വിജയപ്രതീക്ഷ നല്‍കിയെങ്കിലും അവശേഷിച്ച പന്തുകളില്‍ റണ്‍സ് കണ്ടെത്താന്‍ വിഷമിച്ചതും മികച്ച രീതിയില്‍ ബാറ്റ് ചെയ്ത വിജയ് ശങ്കര്‍ പുറത്തായതുമാണ് തമിഴ്‌നാടിന് തിരിച്ചടിയായത്.
മൂന്നാം പന്തില്‍ തമിഴ്‌നാടിന് റണ്‍സെടുക്കാന്‍ സാധിച്ചില്ല. നാലാം പന്തില്‍ നേടിയത് ഒരു റണ്‍. അഞ്ചാം പന്തില്‍ മൂന്ന് റണ്‍സിനു ശ്രമിക്കുന്നതിനിടെയാണ് വിജയ് ശങ്കര്‍ പുറത്തായത്. അവസാന പന്തില്‍ ഒരു റണ്ണാണ് മുരുകന്‍ അശ്വിന് നേടാനായത്. 27 പന്തില്‍ 44 റണ്‍സ് നേടിയ വിജയ് ശങ്കറാണ് തമിഴ്‌നാട് നിരയിലെ ടോപ് സ്‌കോറര്‍.
കര്‍ണ്ണാടകയ്‌ക്കായി റോണി മോറെ രണ്ട് വിക്കറ്റ് വീഴ്‌ത്തിയപ്പോള്‍ കെ.ഗൗതം, ശ്രേയസ് ഗോപാല്‍, ജഗദീഷ സുജിത് എന്നിവര്‍ ഓരോ വിക്കറ്റും സ്വന്തമാക്കി.
