മാഡ്രിഡ്: ലാലിഗായില്‍ ഹാട്രിക് നേടി ലയണല്‍ മെസ്സി. ഇതോടെ ക്രിസ്റ്റ്യാനോ റൊണാള്‍ഡോയുടെ റെക്കോഡ് പഴങ്കഥയായി. 34 തവണ ഹാട്രിക്കെന്ന ക്രിസ്റ്റ്യാനോയുടെ റെക്കോഡാണ് മെസ്സി മറികടന്നത്. റയല്‍ മല്ലോര്‍ക്കക്കെതിരെ ബാഴ്‌സലോണ 5-2ന്റെ തകര്‍പ്പന്‍ ജയമാണ് നേടിയത്. ഇതിലെ മൂന്ന് ഗോളുകള്‍ മെസ്സിയുടെ ഹാട്രിക്കായിരുന്നു. മെസ്സി 35-ാം ഹാട്രിക്ക് എന്ന അപൂര്‍വ്വ നേട്ടമാണ് സ്വന്തമാക്കിയത്.
മെസ്സിക്കൊപ്പം ലൂയീ സുവാരസും കളം നിറഞ്ഞതോടെ ബാഴ്‌സ ത്രസിപ്പിക്കുന്ന കളിമികവാണ് പുറത്തെടുത്തത്. കളിയുടെ 7-ാം മിനിറ്റില്‍ ത്രിമൂര്‍ത്തികളിലൊരാളായ ഗ്രീസ്സ്മാന്‍ ബാഴ്‌സക്ക് ആദ്യ ഗോള്‍ നേടിക്കൊടുത്തു. തുടര്‍ന്നാണ് മെസ്സി തുടക്കമിട്ടത്. 17-ാം മിനിറ്റില്‍ ആദ്യ ഗോള്‍. എന്നാല്‍ ഇതിനിടെ മല്ലോര്‍ക്ക ഒരു ഗോള്‍ തിരിച്ചടിച്ചു. 35-ാം മിനിറ്റില്‍ ആന്റെ ബുദിമിറാണ് മല്ലോര്‍ക്കക്കായി ആദ്യ ഗോള്‍ നേടിയത്. എന്നാല്‍ മെസ്സി അടങ്ങാന്‍ തയ്യാറായിരുന്നില്ല. 41-ാം മിനിറ്റില്‍ ഗോള്‍ മടക്കി. എന്നും മികച്ച ഗോളുകള്‍ തന്റെ പേരിലാക്കുന്ന സുവാരസിന്റേതായിരുന്നു അടുത്ത ഊഴം.
പുറം തിരിഞ്ഞ് ഉപ്പൂറ്റികൊണ്ട് പന്ത് ഗോളാക്കുമ്പോള്‍ എതിരാളികളുടെ 7 പേരാണ് ബോക്‌സ് ഏരിയയിലുണ്ടായിരുന്നത്. 43-ാം മിനിറ്റിലായിരുന്നു ബാഴ്‌സക്കായുള്ള നാലാമത്തെ ഗോള്‍. ഇതിനിടെ കിട്ടിയ അവസരങ്ങളില്‍ ഇരച്ചുകയറിയ മല്ലോര്‍ക്കാനിര 64-ാം മിനിറ്റില്‍ ലീഡ് 4-2 ആയി കുറച്ചു. ബുദിമിറിന്റെതന്നെ വകയായിരുന്നു ടീമിനായുള്ള 2-ാം ഗോള്‍. എന്നാല്‍ റെക്കോഡ് തിരുത്തിയ പ്രകടനവുമായി മെസ്സി 83-ാം മിനിറ്റില്‍ ഹാട്രിക്കോടെ ടീമിന്റെ 5-ാം ഗോളും നേടി ലാ ലിഗ ആരാധകരെ ആവേശത്തിലാക്കി. പോയിന്റ് നിലയില്‍ ബാഴ്‌സലോണ 15 കളികളിലായി 34 പോയിന്റുകളോടെ ഒന്നാമതാണ്. രണ്ടാം സ്ഥാനത്ത് റയല്‍ മാഡ്രിഡും മൂന്നാം സ്ഥാനത്ത് സെവിയയുമാണുള്ളത്.
