ന്യൂഡല്‍ഹി: 2019ന്റെ അവസാനത്തോട് അടുക്കുമ്പോള്‍ സമൂഹമാദ്ധ്യമങ്ങള്‍ ഈ വര്‍ഷത്തെ പ്രധാനപ്പെട്ട കണക്കുകള്‍ കണ്ടെത്തുന്ന തിരക്കിലാണ്. സ്‌പോര്‍ട്‌സില്‍ ഇതുവരെയുള്ള കണക്കുകള്‍ അനുസരിച്ച് ഇന്ത്യന്‍ നായകന്‍ വിരാട് കോഹ്‌ലി മുന്‍ നായകന്‍ മഹേന്ദ്ര സിംഗ് ധോണിക്ക് ജന്മദിനാശംസ നേര്‍ന്നു കൊണ്ട് നടത്തിയ ട്വീറ്റാണ് ഏറ്റവും കൂടുതല്‍ റീട്വീറ്റ് ചെയ്യപ്പെട്ടത്. ട്വിറ്റര്‍ ഇന്ത്യയാണ് ഇക്കാര്യം വെളിപ്പെടുത്തിയത്. കായിക ലോകത്ത് വിരാട് കോഹ്‌ലിയാണ് ട്വീറ്റിലൂടെ ആരാധകരുടെ മനം കവര്‍ന്നത് എന്ന കുറിപ്പോടെയാണ് ട്വിറ്റര്‍ ഇന്ത്യ കണക്കുകള്‍ പുറത്തുവിട്ടിരിക്കുന്നത്.
ജൂലൈ 7നാണ് ധോണിക്ക് ജന്മദിനാശംസകള്‍ നേര്‍ന്നുകൊണ്ട് കോഹ്‌ലി ട്വീറ്റ് ചെയ്തത്. വിശ്വാസം, ബഹുമാനം എന്നീ വാക്കുകളുടെ അര്‍ത്ഥം ചുരുക്കം ചിലര്‍ക്ക് മാത്രമേ മനസിലാകുകയുള്ളൂ. കഴിഞ്ഞ കുറെ വര്‍ഷങ്ങളായി താങ്കളുമായി സൗഹൃദം കാത്തുസൂക്ഷിക്കാനായതില്‍ സന്തോഷമുണ്ട്. താങ്കള്‍ ഞങ്ങള്‍ക്കെല്ലാവര്‍ക്കും ജ്യേഷ്ഠ സഹോദരനാണ്. ഞാന്‍ മുന്‍പു പറഞ്ഞതുപോലെ താങ്കളായിരിക്കും എന്നും എന്റെ നായകന്‍. കോഹ്‌ലി ട്വീറ്റ് ചെയ്തു.
Happy birthday mahi bhai @msdhoni. Very few people understand the meaning of trust and respect and I'm glad to have had the friendship I have with you for so many years. You've been a big brother to all of us and as I said before, you will always be my captain 🙂 pic.twitter.com/Wxsf5fvH2m
— Virat Kohli (@imVkohli) July 7, 2019
കോഹ്‌ലിയുടെ പോസ്റ്റിന് നിരവധി റീട്വീറ്റുകളാണ് ലഭിച്ചിരുന്നത്. ട്വിറ്റര്‍ ഇന്ത്യയുടെ കണക്കുകള്‍ പ്രകാരം 46,000 റീട്വീറ്റുകളാണ് കോഹ്‌ലിയുടെ ട്വീറ്റിന് ലഭിച്ചത്. അതേസമയം, 2019ല്‍ ലോക്‌സഭ തെരഞ്ഞെടുപ്പ് വിജയത്തില്‍ പ്രധാനമന്ത്രി നരേന്ദ്ര മോദി ചെയ്ത ട്വീറ്റാണ് ഏറ്റവും കൂടുതല്‍ റീട്വീറ്റ് ചെയ്യപ്പെട്ടത്. ‘ഗോള്‍ഡന്‍ ട്വീറ്റ്’ എന്നാണ് മോദിയുടെ ഈ ട്വീറ്റിനെ ട്വിറ്റര്‍ വിശേഷിപ്പിച്ചത്.
