മുംബൈ: 2020 ഐപിഎല്‍ സീസണിന് മുന്നോടിയായുള്ള താരലേലത്തില്‍ 332 താരങ്ങളെ ഉള്‍പ്പെടുത്തി പട്ടിക പുറത്തിറക്കി. കേരള രഞ്ജി താരങ്ങളായ സച്ചിന്‍ ബേബി, വിഷ്ണു വിനോദ്, ജലജ് സക്‌സേന, റോബിന്‍ ഉത്തപ്പ, മിഥുന്‍ തുടങ്ങിയ കേരള രഞ്ജി താരങ്ങളും താരലേലപട്ടികയില്‍ ഇടംപിടിച്ചിട്ടുണ്ട്.
997 താരങ്ങളാണ് ഐപിഎല്‍ ലേലത്തില്‍ പങ്കെടുക്കാന്‍ രജിസ്റ്റര്‍ ചെയ്തത്. എട്ട് ഫ്രാഞ്ചൈസികള്‍ സമര്‍പ്പിച്ച ചുരുക്കപട്ടിക പ്രകാരം അന്തിമ പട്ടികയില്‍ 332 കളിക്കാര്‍ ഉള്‍പ്പെടുകയായിരുന്നു. ഇവര്‍ക്കായുള്ള താരലേലം ഡിസംബര്‍ 19ന് കൊല്‍ക്കത്തയില്‍ നടക്കും.
ഇന്ത്യന്‍ ദേശീയ ടീമില്‍ കളിച്ച 19 കളിക്കാരും 24 പുതുമുഖങ്ങളും ഉള്‍പ്പെടുന്നതാണ് അന്തിമ പട്ടിക. 73 കളിക്കാരെയാണ് ലേലത്തിലൂടെ എട്ട് ടീമുകള്‍ കണ്ടെത്തുക. രണ്ടു കോടി അടിസ്ഥാന വിലയുള്ള ഏഴ് താരങ്ങളാണ് ചുരുക്കപട്ടികയില്‍ ഉള്‍പ്പെട്ടിരിക്കുന്നത്. ഇവരെല്ലാം വിദേശ താരങ്ങളാണ്. 1.5 കോടി അടിസ്ഥാനവിലയുള്ള 10 താരങ്ങളില്‍ റോബില്‍ ഉത്തപ്പ് മാത്രമാണ് ഇന്ത്യന്‍ താരം. ഒരു കോടി അടിസ്ഥാനവിലയുള്ള 23 താരങ്ങള്‍ ലേലത്തിലുണ്ട്. ഇവരില്‍ മൂന്ന് പേര്‍ ഇന്ത്യക്കാരാണ്.
വെസ്റ്റ് ഇന്‍ഡീസ് പേസര്‍ കെസ്രിക് വില്യംസ്, ബംഗ്ലാദേശ് താരം മുഷ്ഫീഖുര്‍ റഫീം, ഓസീസ് ലെഗ് സ്പിന്നര്‍ ആദം സാംപ എന്നിവരും ലേലത്തിനുളള അന്തിമ പട്ടികയിലുണ്ട്.
