ന്യൂഡല്ഹി: രാജസ്ഥാനിലെ ശിശു മരണങ്ങളില് പ്രതിഷേധം അറിയിക്കാതെ വരാണസിയിലെ കുഞ്ഞിന്റെ പേരില് ആശങ്ക അറിയിച്ച പ്രിയങ്കയ്ക്കെതിരെ മായാവതി. പൗരത്വ ഭേദഗതിനിയമത്തിനെതിരായ കലാപത്തില് മാതാപിതാക്കള് ജയിലിലായതിനെ തുടര്ന്ന് തനിച്ചായ 14 മാസം പ്രായമുള്ള കുഞ്ഞിന്റെ ദുരവസ്ഥയെ കുറിച്ച് കോണ്ഗ്രസ് ജനറല് സെക്രട്ടറി പ്രിയങ്ക ഗാന്ധി ആരോപിച്ചിരുന്നു. ഇതില് പ്രതിഷേധിച്ചാണ് മായാവതി രംഗത്തെത്തിയത്.
മാതാപിതാക്കളില് നിന്ന് വേര്പിരിഞ്ഞ വരാണസിയിലെ പിഞ്ചുകുഞ്ഞിന്റെ ദുരവസ്ഥയെ മുഖ്യമന്ത്രി യോഗി ആദിത്യനാഥ് ശ്രദ്ധിക്കണമെന്ന് പ്രിയങ്കാ ഗാന്ധി ആവശ്യപ്പെട്ടിരുന്നു. അതേസമയം, കോണ്ഗ്രസ് ഭരിക്കുന്ന രാജസ്ഥാനിലെ കോട്ട ആശുപത്രിയില് ഒരു മാസത്തിനുള്ളില് നൂറ് കുട്ടികളാണ് മരിച്ചത്. ഈ സംഭവം ചൂണ്ടിക്കാട്ടിയാണ് മായാവതി പ്രിയങ്കയ്ക്കെതിരെ വിമര്ശനം ഉന്നയിച്ചത്. മരിച്ച കുട്ടികളുടെ വീട് പ്രിയങ്ക സന്ദര്ശിക്കാത്തതിനെ കുറിച്ചും മായാവതി കുറ്റപ്പെടുത്തി.
കഴിഞ്ഞ ഒരു മാസത്തിനിടെ കോട്ട സര്ക്കാര് ആശുപത്രിയില് 100 കുട്ടികളാണ് മരിച്ചത്.വിഷയത്തില് രാജസ്ഥാന് സര്ക്കാരിന്റെ നിലപാട് നിരുത്തരവാദപരമാണ്. പ്രിയങ്ക ഇപ്പോള് നടത്തുന്നത് രാഷ്ട്രീയം ലക്ഷ്യം വെച്ചാണെന്നും അത് യുപിയിലെ ജനങ്ങള് മനസിലാക്കണമെന്നും മായാവതി കൂട്ടിച്ചേര്ത്തു.