മിലാന്‍: ഇറ്റാലിയന്‍ ലീഗില്‍ കളിക്കുന്ന മികച്ചതാരങ്ങളെ ഉള്‍പ്പെടുത്തി ദശകത്തിലെ ഏറ്റവും മികച്ച ടീമിനെ സീരി ഏ പ്രഖ്യാപിച്ചു. സീരി ഏ ഇലവനെ താരങ്ങളുടെ സ്ഥിരതക്ക് കിട്ടിയ പോയിന്റുകളുടെ അടിസ്ഥാനത്തിലാണ് താരങ്ങളെ തീരുമാനിച്ചതെന്ന് സീരി ഏ ഭാരവാഹികള്‍ അറിയിച്ചു.
ലോക ഫുട്‌ബോളിലെ പകരം വക്കാനില്ലാത്ത ജിയാന്‍ലൂയിജി ബഫണാണ് ഗോളിയായി പരിഗണിക്കപ്പെട്ടിരിക്കുന്നത്. 7 സ്‌കൂഡേറ്റി പോയിന്റുകളാണ് ബഫണിന് ലഭിച്ചിരിക്കുന്നത്. കഴിഞ്ഞ രണ്ടു ദശകമായി ലോകത്തെ ഏറ്റവും മികച്ച അഞ്ചു ഗോള്‍കീപ്പര്‍മാരിലൊരാളായി ബഫണ്‍ വലകാക്കുകയാണ്.
റൈറ്റ് ബാക്ക് പൊസിഷനില്‍ ക്രിസ്റ്റ്യന്‍ മാഗിയോവാണ് ഇടം നേടിയിരിക്കുന്നത്. നാപ്പോളിയുടെ താരമാണ് മാഗിയോ. സെന്റര്‍ ബാക്കായി യുവന്റസിന്റെ ലിയാനാര്‍ഡോ ബൊണൂച്ചിയാണുള്ളത്. മറ്റൊരു താരം ജിയോര്‍ജിയോ ചെല്ലിനിയാണ്.യുവന്റസിന്റെ തന്നെ താരമാണ്. ലെഫ്റ്റ് ബാക്കായി യുവന്റസിന്റെ തന്നെ അലക്‌സ് സാന്‍ഡ്രോ ടീമിലുണ്ട്.
മുന്‍നിരയില്‍ ആേ്രന്ദ പിര്‍ലോ ഇടംനേടിയപ്പോള്‍ സെന്റര്‍ മിഡ്ഫീല്‍ഡില്‍ റാഡ്ജാ നെയ്ന്‍ഗോലാന്‍ ടീമിലുണ്ട്. നിലവില്‍ കാഗ്ലിയാരിക്കായി കളിക്കുകയാണ്. സെന്റര്‍ മിഡ്ഫീല്‍ഡില്‍ മിരാലെം ജാനിക്കാണ് നിലയുറപ്പിച്ചിരിക്കുന്നത്. സെന്റര്‍ അറ്റാക്കിംഗ് മിഡ്ഫീല്‍ഡറായി മാരെക് ഹാംസിക്കുണ്ടാകും.നാപ്പോളിയുടെ മികച്ചതാരമാണ് മാരെക്.
സ്്‌ട്രൈക്കറായി അന്റോണിയോ ഡീ നതാലെയാണ് മുന്നേറ്റനിരയിലുളളത്. ഉദീനീസെ ക്ലബ്ബിന്റെ മികച്ച താരമാണ് നതാലെ. മറ്റൊരു സ്‌ട്രൈക്കറായി യുവന്റസിന്റെ ഗോണ്‍സാലോ ഹിഗ്വയിനാണ് ഇടംനേടിയിരിക്കുന്നത്. സ്‌ട്രൈക്കര്‍മാരായി ഒപ്പം പരിഗണിച്ചവരില്‍ സിരോ ഇമ്മോബൈല്‍, ഫാബിയോ ക്വാഗ്ലിയാരേല്ല, മൗറോ ഇക്കാര്‍ഡി, ഡ്രൈസ് മാര്‍ട്ടനസ് എന്നിവരാണ്.
