മുംബൈ: ഗുവാഹട്ടിയില്‍ ഇന്ത്യ-ശ്രീലങ്ക മത്സരത്തിനിടെ മഴ വില്ലനായെത്തി കളി തടസപ്പെടുത്തിയെങ്കില്‍ രഞ്ജി ട്രോഫിയില്‍ പാമ്പുകളാണ് വില്ലന്‍മാരായത്. മുംബൈയിലെ ബാന്ദ്ര കുര്‍ള കോംപ്ലക്‌സില്‍ നടന്ന മുംബൈ-കര്‍ണാടക മത്സരമാണ് രണ്ട് പാമ്പുകള്‍ തടസപ്പെടുത്തിയത്.
മത്സരത്തിന്റെ മൂന്നാം ദിനം കളി പുരോഗമിക്കുന്നതിനിടയിലാണ് മൈതാനത്ത് പാമ്പുകളുടെ സാന്നിദ്ധ്യം കളിക്കാരുടെ ശ്രദ്ധയില്‍പ്പെട്ടത്. മത്സരം വൈകിയതോടെ പാമ്പുപിടുത്തക്കാരനെത്തിയാണ് രണ്ട് പാമ്പുകളെയും പിടികൂടിയത്. മത്സരത്തില്‍ കര്‍ണാടക 5 വിക്കറ്റിന് വിജയിച്ചിരുന്നു.
രഞ്ജി ട്രോഫിയില്‍ ഇത് ആദ്യമായല്ല പാമ്പ് കാരണം മത്സരം മുടങ്ങുന്നത്. ഡോ. ഗോകരാജു ലിയാല ഗംഗരാജു എസിഎ ക്രിക്കറ്റ് സ്‌റ്റേഡിയത്തില്‍ നടന്ന ആന്ധ്രപ്രദേശ്-വിദര്‍ഭ മത്സരവും പാമ്പുകള്‍ കാരണം സമാനമായ രീതിയില്‍ തടസപ്പെട്ടിരുന്നു.
