മെല്ബണ്: കരിയറിലെ 100ാം ഓസ്ട്രേലിയന് ഓപ്പണ് മത്സരത്തില് സ്വിറ്റ്സര്ലന്ഡ് ഇതിഹാസം റോജര് ഫെഡറര്ക്ക് വിജയം. മൂന്നാം റൗണ്ടിലെ ആവേശകരമായ മത്സരത്തില് ഓസ്ട്രേലിയന് താരം ജോണ് മില്മാനെയാണ് ഫെഡറര് കീഴടക്കിയത്. മത്സരം നാല് മണിക്കൂറിലേറെ നീണ്ടുനിന്നു.
മത്സരത്തിന്റെ ആദ്യ സെറ്റില് തന്നെ മില്മാന് ഫെഡററെ ഞെട്ടിച്ചു. തുടര്ന്ന് രണ്ട്, മൂന്ന് സെറ്റുകളില് ഫെഡറര് ഉജ്ജ്വലമായ തിരിച്ചുവരവ് നടത്തി. എന്നാല് വിട്ടുകൊടുക്കാന് മില്മാന് തയ്യാറാകാതിരുന്നതോടെ പോരാട്ടം കനത്തു. അവസാന സെറ്റ് വിജയിയെ നിര്ണയിക്കുമെന്ന ഘട്ടത്തില് ഇരുവരും ഇഞ്ചോടിഞ്ച് പ്രകടനമാണ് കാഴ്ചവെച്ചത്.
മത്സരം അവസാനം ടൈ ബ്രേക്കറിലേക്ക് നീങ്ങി. ടൈബ്രേക്കറില് 3-0 എന്ന നിലയില് മില്മാന് ലീഡെടുത്തെങ്കിലും പരിചയസമ്പത്തിന്റെ പിന്ബലത്തില് ഫെഡറര് മത്സരത്തിലേക്ക് തിരിച്ചെത്തുകയായിരുന്നു. അഞ്ച് സെറ്റ് നീണ്ടുനിന്ന പോരാട്ടത്തില് പരാജയത്തിന്റെ വക്കില് നിന്ന ശേഷമാണ് ഫെഡറര് മത്സരം പിടിച്ചടക്കിയത്.
ജോണ് മില്മാന് ഒരു പോരാളിയാണെന്നും ഏറ്റവും മികച്ച മത്സരങ്ങളിലൊന്നാണ് അദ്ദേഹം കാഴ്ചവെച്ചതെന്നും മത്സര ശേഷം ഫെഡറര് പറഞ്ഞു. സ്കോര് 4-6, 7-6, 6-4, 4-6, 7-6.
