ഓറഞ്ച് വില്പ്പന നടത്തി അതിലൂടെ ലഭിക്കുന്ന പണം കൊണ്ട് നിര്ധനരായ കുട്ടികള്ക്ക് വിദ്യഭ്യാസം നല്കാനായി സ്കൂള് സ്ഥാപിച്ച മഹത് വ്യക്തിയാണ് ഹരകേള ഹജബ. കഴിഞ്ഞ 20 വര്ഷങ്ങളായി കുട്ടികള്ക്ക് വിദ്യാഭ്യാസം നല്കുന്നതിനായി അധ്വാനിക്കുന്ന ഹരകേള ഹജബയുടെ പ്രവര്ത്തനങ്ങള്ക്കുള്ള ഏറ്റവും മികച്ച അംഗീകാരം തന്നെയാണ് പത്മശ്രീ പുരസ്ക്കാരം.
കുട്ടികളുടെ ജീവിതത്തിലേക്ക് അക്ഷരത്തിന്റെ പ്രകാശമെത്തിക്കുന്ന ഇദ്ദേഹം അക്ഷര സാന്റാ എന്നാണ് അറിയപ്പെടുന്നത്. ദക്ഷിണ കന്നഡയിലെ മംഗളൂരുവിലെ ന്യൂപഡുപ്പു സ്വദേശിയാണ് ഹജബ. വിദ്യാഭ്യാസത്തിന്റെ കുറവ് ഏറെ അനുഭവിച്ച അദ്ദേഹം തന്റെ ഭാവി തലമുറ വിദ്യാഭ്യാസ ഇല്ലാത്തതിന്റെ ബുദ്ധിമുട്ട് അനുഭവിക്കാതിരിക്കാന് വേണ്ടിയാണ് സ്കൂള് സ്ഥാപിച്ചത്. ഓറഞ്ച് വില്പ്പനയില് നിന്നും തനിക്ക് ലഭിക്കുന്ന തുച്ഛമായ വരുമാനത്തില് നിന്നാണ് അദ്ദേഹം സ്കൂള് ആരംഭിക്കുന്നത്.
വിദേശികളായ ദമ്പതികള് ഒരിക്കല് ഹജബയോട് ഓറഞ്ചിന്റെ വില ചോദിച്ചു. തുളുവും ബ്യാരി ഭാഷയും മാത്രം അറിയാമായിരുന്ന ഹജബയ്ക്ക് അവര്ക്ക് മറുപടി നല്കാന് കഴിഞ്ഞില്ല. അവര് ഓറഞ്ച് വാങ്ങാതെ മടങ്ങുകയും ചെയ്തു. തന്റെ ഈ അവസ്ഥ ഒരിക്കലും ഭാവി തലമുറയ്ക്ക് ഉണ്ടാകരുതെന്ന നിര്ബന്ധമാണ് വിദ്യാലയം തുടങ്ങാന് ഹജബിന് പ്രേരണയായത്.
1999 ലാണ് അദ്ദേഹം ആദ്യമായി സ്കൂള് സ്ഥാപിക്കുന്നത്. ആദ്യമൊക്കെ കുട്ടികള് കുറവായിരുന്നെങ്കിലും പിന്നീട് കുട്ടികളുടെ എണ്ണത്തില് വര്ധനവുണ്ടായി. തുടര്ന്ന് സ്കൂള് ഒരു പുതിയ കെട്ടിടത്തിലേക്ക് മാറ്റി. ന്യൂപഡുപ്പില് ഒരു സ്കൂളിന്റെ ആവശ്യമുണ്ടെന്ന് അധികൃതരെ ബോധ്യപ്പെടുത്താനായിരുന്നു പിന്നീട് ഹജബയുടെ ശ്രമം. നിരന്തര പരിശ്രമത്തിന്റെ ഫലമായി ഒടുവില് ആ ശ്രമം വിജയിച്ചു. സ്കൂള് നിര്മ്മാണത്തിനായി കുറച്ചു ഭൂമി അനുവദിക്കപ്പെട്ടു. 2004 ഡിസംബര് 14 ന് ന്യൂപഡപ്പു ഗ്രാമത്തില് പുതിയ സ്കൂള് നിലവില് വന്നു. 125 വിദ്യാര്ത്ഥികളും നാല് അധ്യാപകരുമായിരുന്നു അന്ന് സ്കൂളില് ഉണ്ടായിരുന്നത്. നിരവധി വിദ്യാര്ത്ഥികളാണ് അറിവ് നേടാനായി ഇന്ന് ഈ വിദ്യാലയത്തിലുള്ളത്. സ്കൂളിനെ പ്രീ യൂണിവേഴ്സിറ്റി സ്കൂളായി ഉയര്ത്താനുള്ള ശ്രമത്തിലാണ് ഹജബ.
സ്വന്തമായി നല്ലൊരു വീടു പോലും ഹജബയ്ക്കില്ല. കുട്ടികള്ക്ക് വിദ്യാഭ്യാസം നല്കാനാണ് ഹജബ ഇന്നും അധ്വാനിക്കുന്നത്.