മെൽബൺ: ഓസ്ട്രേലിയയിൽ നടക്കുന്ന വനിതാ ത്രിരാഷ്ട്ര ട്വന്റി 20 പരമ്പരയിലെ ആദ്യ മത്സരത്തിൽ ഇന്ത്യയ്ക്ക് ജയം. ഇംഗ്ലണ്ടിനെ അഞ്ച് വിക്കറ്റിനാണ് ഇന്ത്യ തകർത്തത്. 148 റൺസ് വിജയലക്ഷ്യവുമായി ഇറങ്ങിയ ഇന്ത്യൻ വനിതകൾ മൂന്ന് ബാക്കി നിൽക്കേ അഞ്ച് വിക്കറ്റ് നഷ്ടത്തിൽ ജയം സ്വന്തമാക്കുകയായിരുന്നു.
പുറത്താകാതെ 42 റൺസ് നേടിയ ക്യാപ്റ്റൻ ഹർമൻ പ്രീത് കൗറിന്റെ പ്രകടനമാണ് ഇന്ത്യൻ ജയം അനായാസമാക്കിയത്. 34 പന്തുകളിൽ അഞ്ച് ബൗണ്ടറികളും ഒരു സിക്സറും സഹിതമാണ് ഹർമൻ പ്രീത് 42 റൺസ് എടുത്തത്. ഓപ്പണർ ഷഫാലി വർമ്മ 25 പന്തിൽ 30 ഉം ജമീമ റോഡ്രിഗസ് 20 പന്തിൽ 26 റൺസുമെടുത്തു.
നേരത്തെ ടോസ് നഷ്ടപ്പെട്ട് ബാറ്റിംഗ് ആരംഭിച്ച ഇംഗ്ലണ്ട് 7 വിക്കറ്റ് നഷ്ടത്തിലാണ് 147 റൺസെടുത്തത്. അർദ്ധ സെഞ്ച്വറി നേടിയ ഹെതർ നൈറ്റിന്റെ മികവിലാണ് ഇംഗ്ലണ്ട് ഭേതപ്പെട്ട സ്കോർ പടുത്തുയർത്തിയത്. ഹെതർ നൈറ്റ് 44 പന്തിൽ 67 റൺസെടുത്തു.
