മെല്ബണ്: ഓസ്ട്രേലിയന് ഓപ്പണ് 8-ാം തവണയും നേടിയ ജോക്കോവിച്ച് തന്റെ സാമൂഹ്യപ്രതിബദ്ധതയും സമ്മാനദാനച്ചടങ്ങില് പ്രകടമാക്കി. ലോക ഒന്നാം നമ്പറായി മടങ്ങിവന്നതില് ഏറെ സന്തോഷിക്കുന്നുവെന്ന് പറഞ്ഞ ജോക്കോവിച്ച് നദാലിന്റേയും ഫെഡററിന്റേയും പ്രകടനത്തെ പ്രശംസിച്ചു.സീസണ് മുഴുവന് ഒന്നാം സ്ഥാനം നിലനിര്ത്തുന്ന പ്രകടനം നടത്താനാകുമെന്ന പ്രതിക്ഷയും ജോക്കോവിച്ച് പങ്കുവച്ചു.
ഓസ്ട്രേലിയന് ഓപ്പണ് ട്രോഫി സ്വീകരിച്ച ശേഷമുള്ള പ്രസംഗത്തില് ഓസ്ട്രേലിയ അനുഭവിച്ച നൂറ്റാണ്ടിലെ ഏറ്റവും വലിയ കാട്ടുതീ ദുരന്തത്തില് ജീവനും സ്വത്തും നഷ്ടപ്പെട്ടവരേയും അവരുടെ കുടുംബാംങ്ങളേയും അനുസ്മരിച്ചു. ഒപ്പം അമേരിക്കയില് ഹെലികോപ്റ്റര് അപകടത്തില് കൊല്ലപ്പെട്ട ബാസ്ക്കറ്റ് ബോള് താരം കോബി ബ്രയന്റിനേയും മകളേയും ഏറെ ദു:ഖത്തോടെ അനുസ്മരിച്ചത് കാണികളുടെ കണ്ണുകളേയും ഈറനണിയിച്ചു. നിറഞ്ഞ കയ്യടിയോടെയാണ് ജോക്കോവിച്ചിന്റെ പ്രസംഗത്തെ കായികപ്രേമികള് സ്വീകരിച്ചത്.
‘2020 നിരവധി ദുരന്തങ്ങളാണ് നമുക്ക് മുന്നില് കൊണ്ടുവന്നത്. ഓസ്ട്രേലിയയെ വിഴുങ്ങിയ കാട്ടുതീ, ലോകത്തിന്റെ നിരവധി ഭാഗത്ത് നടക്കുന്ന അക്രമങ്ങള് എല്ലാം നിരവധി മനുഷ്യ ജീവനുകള് കവര്ന്നിരിക്കുന്നു. എന്റെ കായിക ജീവിതത്തില് ഏറെ സ്വാധീനിച്ച അമേരിക്കയുടെ ബാസ്ക്കറ്റ് ബോള് ഇതിഹാസം ബ്രയന്റിന്റേയും മകളുടേയും ഒപ്പം മരണമടഞ്ഞ സഹപ്രവര്ത്തകരുടേയും ഓര്മ്മകള്ക്ക് മുന്നില് പ്രണമിക്കുന്നു. നമ്മളെല്ലാവരും മറ്റെല്ലാം മറന്ന് എക്കാലത്തും സ്നേഹത്തോടെ ഒരുമിച്ച് ജീവിക്കണമെന്നാണ് ഈ ദുരന്തങ്ങള് ഓര്മ്മിപ്പിക്കുന്നതെന്ന് മറക്കരുത്’ സെര്ബിയന് ടെന്നീസ് താരം ജോക്കോവിച്ച് സൂചിപ്പിച്ചു.