മെല്‍ബണ്‍: ഓസ്ട്രേലിയയില്‍ പടര്‍ന്ന കാട്ടുതീയില്‍ ദുരിതം നേരിടുന്നവരെ സഹായിക്കാനായി സംഘടിപ്പിച്ച ബുഷ്ഫയര്‍ ക്രിക്കറ്റ് ബാഷ് ക്ലാഷില്‍ ഗില്‍ക്രിസ്റ്റ് XIനെതിരെ പോണ്ടിംഗ് XIന് 1 റണ്‍ വിജയം. ടോസ് നഷ്ടപ്പെട്ട് ബാറ്റിംഗിനിറങ്ങിയ പോണ്ടിംഗ് X1 നിശ്ചിത 10 ഓവറില്‍ 5 വിക്കറ്റ് നഷ്ടത്തില്‍ 104 റണ്‍സ് നേടിയപ്പോള്‍ ഗില്‍ക്രിസ്റ്റ് XIന് 6 വിക്കറ്റ് നഷ്ടത്തില്‍ 103 റണ്‍സ് നേടാനെ കഴിഞ്ഞുള്ളൂ.
ഓപ്പണര്‍മാരായ ആദം ഗില്‍ക്രിസ്റ്റും ഷെയ്ന്‍ വാട്‌സണും ഗില്‍ക്രിസ്റ്റ് XIന് മികച്ച തുടക്കമാണ് നല്‍കിയത്. ഗില്‍ക്രിസ്റ്റ് 11 പന്തില്‍ 2 ബൗണ്ടറികളോടെ 17 റണ്‍സ് നേടിയപ്പോള്‍ വാട്‌സണ്‍ 9 പന്തില്‍ 3 സിക്‌സറുകളും 2 ബൗണ്ടറികളും സഹിതം 30 റണ്‍സ് നേടി. 13 പന്തില്‍ 29 റണ്‍സ് നേടിയ ആൻഡ്രൂ സൈമണ്‍സും മികച്ച കളിയാണ് പുറത്തെടുത്തത്. അവസാന പന്തില്‍ 5 റണ്‍സ് വേണ്ടിയിരുന്നെങ്കിലും 3 റണ്‍സ് എടുക്കാനെ ഗില്‍ക്രിസ്റ്റിന്റെ ടീമിന് സാധിച്ചുള്ളൂ.
പോണ്ടിംഗ് XIന് വേണ്ടി ബ്രെറ്റ് ലീ 2 ഓവറില്‍ 11 റണ്‍സ് വഴങ്ങി 2 വിക്കറ്റ് വീഴ്‌ത്തി. ലൂക് ഹോഡ്ജ് 2 ഓവറില്‍ വെറും 8 റണ്‍സ് മാത്രം വഴങ്ങി 1 വിക്കറ്റ് സ്വന്തമാക്കി. 2 ഓവര്‍ ബൗള്‍ ചെയ്ത വസീം അക്രമിന് വിക്കറ്റൊന്നും നേടാനായില്ല.
