ലണ്ടന്‍: മുന്‍ ലോക ഒന്നാം നമ്പര്‍ ടെന്നീസ് താരം ബ്രിട്ടന്റെ ആന്‍ഡി മുറേ പരിക്കില്‍ നിന്ന് അതിശക്തമായ തിരിച്ചുവരവാണ് നടത്താന്‍ പോകുന്നതെന്ന് പ്രമുഖ പരിശീലകന്‍ ജോസ് ഹിഗ്വിറാസ് പറഞ്ഞു. 32 കാരനായ മുറേ കഴിഞ്ഞ ഡേവിസ് കപ്പിനിടെയാണ് ഇടുപ്പെല്ലിന്റെ ശസ്ത്രക്രിയക്കായി കളം വിട്ടത്.
‘ടെന്നീസ് രംഗത്ത് ആര്‍ക്കെങ്കിലും മികവോടെ ഒരു മടങ്ങി വരവുണ്ടെങ്കില്‍ അത് ആന്‍ഡിയുടേതായിരിക്കും’ റോജര്‍ ഫെഡററെവരെ പരിശീലിപ്പിച്ച പരിചയസമ്പന്നനായ പരിശീലകന്‍ ജോസ് സൂചിപ്പിച്ചു. മുന്‍ ടെന്നീസ് കരുത്തന്മാരായിരുന്ന പീറ്റ് സാംപ്രാസ്, ജിം കൊറിയര്‍, മൈക്കിള്‍ ചാംങ് എന്നിവരുടെ പരിശീലകനായിരുന്നു 66 കാരനായ ജോസ്.
‘ഏതൊരു കായികതാരത്തെ സംബന്ധിച്ചും പരിക്കുകള്‍ എന്നും ഒരു ശാപമാണ്. മുറേയെ സംബന്ധിച്ച് കരിയറില്‍ ഏറ്റവും ഉയരത്തില്‍ നില്‍ക്കുമ്പോളാണ് പരിക്ക് പിടികൂടിയത്. എന്നാല്‍ നിലവിലെ അവസ്ഥയില്‍ ഉടന്‍ കളത്തിലിറങ്ങാന്‍ സാധിക്കുമെന്നാണ് വിശ്വാസം ‘ ജോസ് വ്യക്തമാക്കി.
