മിലാന്: ക്രിസ്റ്റ്യാനോ റൊണാല്‍ഡോയുടെ പ്രതിഭയില്‍ യുവന്റസ് എസി മിലാനോട് തോല്‍ക്കാതെ അവസാന നിമിഷം രക്ഷപെട്ടു. ഇറ്റാലിയന്‍ കപ്പ് രണ്ടാം സെമിഫൈനലിന്റെ ആദ്യപാദത്തിലാണ് യുവന്റസ്- എസി മിലാന് മത്സരം 1-1ന് സമനിലയിലായത്.
ആദ്യമേ ലീഡു നേടി മുന്നേറിയ എസി മിലാന് 71-ാം മിനിറ്റില്‍ തിയോ ഹെര്‍ണാണ്ടസിനെ നഷ്ടമായി. ചുവപ്പുകാര്‍ഡുകണ്ടാണ് ഹെര്‍ണാണ്ടസ് പുറത്തുപോകേണ്ടിവന്നത്. ആദ്യ സെമിയില്‍ ഇന്റര്‍ മിലാന്-നാപ്പോളി മത്സരം ഇന്നലെ നാപ്പോളി ആദ്യ ജയം നേടി നില്‍ക്കുകയാണ്.
ആദ്യ പകുതിയില്‍ ഇരുടീമുകളും ഗോളടിക്കാനുള്ള ശ്രമം പരസ്പരം പ്രതിരോധിക്കുന്നതില്‍ വിജയിച്ചു. എന്നാല്‍ രണ്ടാം പകുതിയില്‍ 61-ാം മിനിറ്റില്‍ ആന്റെ റാബിക്കിന്റെ ഗോളില്‍ എസി മിലാന് ലീഡ് നേടി. ഇതിനിടെ കളി പരുക്കനായതോടെ തിയോക്ക് ചുവപ്പ് കാര്‍ഡ് കാണേണ്ടിയും വന്നു. കളിയുടെ അവസാന നിമിഷം ഇഞ്ചുറി ടൈമില്‍ ലഭിച്ച പെനാല്‍റ്റി മുതലാക്കുന്നതില്‍ യുവന്റസിന്റെ സൂപ്പര്‍താരം റൊണാള്‍ഡോക്ക് പിഴച്ചില്ല. അതിവേഗത്തില്‍ മുന്നേറിയ ക്രിസ്റ്റ്യാനോയുടെ ഷോട്ട് ഡേവിഡ് കലാബ്രിയയുടെ കയ്യില്‍ തട്ടിയതിനാണ് പെനാല്‍റ്റി ലഭിച്ചത്. സെമിയിലെ രണ്ടാം പാദം മാര്‍ച്ച് 3ന് നടക്കും.
