മിലാന്: ഇറ്റാലിയന്‍ ലീഗിലെ 25-ാം റൗണ്ട് മത്സരങ്ങളില്‍ യുവന്റസിനും നാപ്പോളിക്കും ജയം. അതേസമയം മിലാനും ഉദിനീസക്കും സമനിലകൊണ്ട് തൃപ്തിപെടേണ്ടി വന്നു.
ഇന്നലെ ആദ്യ മത്സരത്തില് നാപ്പോളി നേരിട്ടത് ബ്രെസിയക്ലബ്ബിനെയാണ്. ഒന്നിനെതിരെ രണ്ടുഗോളുകള്‍ക്കാണ് നാപ്പോളി ജയം സ്വന്തമാക്കിയത്. കളിയുടെ ആദ്യപകുതിയില്‍ ജോണ്‍ ചാന്‍സലറുടെ ഗോളില്‍ ബ്രെസിയ മുന്നിലെത്തി. നാപ്പോളി എന്നാല്‍ രണ്ടാം പകുതിയില്‍ തിരിച്ചടിച്ചു.49-ാം മിനിറ്റിലെ പെനാല്‍റ്റി മുതലാക്കി സമനില നേടി. തുടര്‍ന്ന് 54-ാം മിനിറ്റില്‍ ഫാബിയാന്‍ പെന്ന വിജയഗോളുമടിച്ചു.
ക്രിസ്റ്റ്യാനോ തന്റെ ആയിരം മത്സരങ്ങള്‍ തികച്ച കളിയാണ് രണ്ടാമത് നടന്നത്. യുവന്റസിന്റെ എതിരാളികള്‍ സ്പാളായിരുന്നു. കളിയുടെ 39-ാം മിനിറ്റില്‍ ക്രിസ്റ്റ്യാനോ റൊണാള്‍ഡോ തന്റെ പ്രതിഭ തെളിയിച്ച് ആദ്യ ഗോള്‍ നേടി. തുടര്‍ന്ന് രണ്ടാം പകുതിയുടെ 60-ാം മിനിറ്റില്‍ ആരോണ്‍ റാംസേ രണ്ടാം ഗോളും നേടി. പൊരുതികളിച്ച സ്പാളിനായി 69-ാം മിനിറ്റില്‍ കിട്ടിയ പെനാല്‍റ്റി മുതലാക്കി ഗോള്‍ വ്യത്യാസം 1-2 ആക്കി കുറച്ചു.
ഇതിനിടെ മികച്ച ടീമുകളായ മിലാന്-ഫിയാറെന്റീന പോരാട്ടം ഓരോ ഗോളുകളടിച്ച് സമനിലയില്‍ പിരിഞ്ഞു. ഇരുടീമുകളും ശക്തമായ പ്രതിരോധം തീര്‍ത്തതോടെ ആദ്യ പകുതി ഗോള്‍ രഹിതമായിരുന്നു.എന്നാല്‍ രണ്ടാം പകുതിയില്‍ ആന്റെ റാബിക് മിലാന് ലീഡ് നല്‍കി. 56-ാം മിനിറ്റിലായിരുന്നു ഗോള്‍. എന്നാല്‍ 85-ാം മിനിറ്റില്‍ കിട്ടിയ പെനാല്‍റ്റി മുതലാക്കി ഫിയോറന്റീന സമനില പിടിച്ചു. ഇന്നലെ നടന്ന നാലാം മത്സരത്തില് ഉദിനീസ- ബൊലോഗ്ന പോരാട്ടവും ഒരോ ഗോളുവീതമടിച്ച് സമനിലയില്‍ പിരിഞ്ഞു. 33-ാം മിനിറ്റില്‍ സ്റ്റെഫാനോ ഒസാക്കയാണ് ഉദിനീസയെ മുന്നിലെത്തിച്ചത്. കളി തീരാന്‍ നിമിഷങ്ങള്‍ മാത്രം ബാക്കി നില്‍ക്കേ റോഡ്രിഗോ പലാസിയോ നിര്‍ണ്ണായകമായ സമനില ഗോളും നേടി.
