ശ്രീനഗര്‍: സ്വന്തം തട്ടകത്തില്‍ റിയല്‍ കശ്മീര്‍ എഫ് സിക്ക് ജയം. ഇന്ത്യന്‍ ആരോസിനെയാണ് എതിരില്ലാത്ത ഒരു ഗോളിന് കശ്മീര്‍ ടീം തോല്‍പ്പിച്ചത്. ശ്രീനഗറിലെ ടിആര്‍സി മൈതാനത്താണ് മത്സരം നടന്നത്.മധ്യനിരയിലെ ഐവറി താരം ബാസി അര്‍മാന്റാണ് ഗോള്‍ നേടിയത്. കളിയുടെ 70-ാം മിനിറ്റിലാണ് കശ്മീര്‍ ക്ലബ്ബ് സ്വന്തം കാണികള്‍ക്ക് മുന്നില്‍ ആവേശമായത്.
ലീഗില്‍ 12 കളികളിലായി 18 പോയിന്റുകളോടെ റിയല്‍ കശ്മീര്‍ എഫ് സി 5-ാം സ്ഥാനത്തേക്ക് കയറി. ഇന്ത്യന്‍ ആരോസ് 13 കളികളിലായി 8 പോയിന്റുകള്‍ മാത്രമാണ് നേടിയിട്ടുള്ളത്. ഇരുടീമുകളും മുന്നത്തെ കളി തോറ്റ ശേഷമാണ് ഏറ്റുമുട്ടിയത്. മഞ്ഞിലെ പുള്ളിപ്പുലികളെന്ന വിളിപ്പേരുള്ള കശ്മീര്‍ ടീം ശക്തമായ ആക്രമണമാണ് കളിയിലുടനീളം കാഴ്ചവച്ചത്. ലീഗില്‍ ഇനി 6 മത്സരങ്ങള്‍ കൂടി കശ്മീര്‍ ടീമിന് ബാക്കിയുണ്ട്.
