ന്യൂഡല്ഹി: ട്വന്റി20 ക്രിക്കറ്റില് ഇരട്ട സെഞ്ച്വറിയടിക്കാന് കെല്പ്പുള്ള ബാറ്റ്സ്മാനെ തെരഞ്ഞെടുത്ത് മുന് ഓസ്ട്രേലിയന് ക്രിക്കറ്റ് താരം ബ്രാഡ് ഹോഗ്. കുട്ടിക്ക്രിക്കറ്റില് ആരും ഇതുവരെ സ്വന്തമാക്കിയിട്ടില്ലാത്ത റെക്കോര്ഡ് കുറിക്കാന് ഒരേയൊരു ബാറ്റ്സ്മാന് മാത്രമേ കഴിയുള്ളൂ എന്ന് ഹോഗ് ഉറപ്പിച്ചു പറയുന്നു. ഇന്ത്യന് താരം രോഹിത് ശര്മ്മക്ക് മാത്രമേ നിലവില് അതിന് സാധിക്കൂ എന്നാണ് ഹോഗ് പറയുന്നത്.
‘നിലവില് രോഹിത് ശര്മ്മക്ക് മാത്രമേ ട്വന്റി20യില് ഇരട്ട സെഞ്ച്വറിയടിക്കാന് സാധിക്കൂ. കാരണം അദ്ദേഹം മികച്ച സ്ട്രൈക്ക് റേറ്റോടെ കൃത്യമായ ടൈമിംഗില് ഗ്രൗണ്ടിന്റെ എല്ലാ ഭാഗത്തേക്കും ഷോട്ടുകള് പായിക്കാന് കഴിവുള്ള കളിക്കാരനാണ്’. ഹോഗ് പറഞ്ഞു.
ട്വന്റി20യില് ഏറ്റവും കൂടുതല് റണ്സ് നേടിയ ബാറ്റ്സ്മാന്മാരുടെ പട്ടികയില് രണ്ടാം സ്ഥാനത്താണ് രോഹിത് ശര്മ്മ. 2,773 റണ്സാണ് രോഹിത്തിന്റെ അക്കൗണ്ടിലുള്ളതെങ്കില് വെറും 21 റണ്സ് മാത്രം വ്യത്യാസത്തിലാണ് ഇന്ത്യന് നായകന് വിരാട് കോഹ്ലി ഒന്നാം സ്ഥാനത്തു തുടരുന്നത്. ഏകദിനത്തില് മൂന്ന് ഇരട്ട സെഞ്ച്വറികളും ട്വന്റി20യില് നാല് സെഞ്ച്വറികളുമാണ് രോഹിത്തിന്റെ പേരിലുള്ളത്.
സിംബാബ്വെക്കെതിരെ 76 പന്തില് ആരോണ് ഫിഞ്ച് നേടിയ 172 റണ്സാണ് നിലവില് അന്താരാഷ്ട്ര ട്വന്റി20യിലെ ഉയര്ന്ന വ്യക്തിഗത സ്കോര്. മൂന്നാമത്തെ ഉയര്ന്ന വ്യക്തിഗത സ്കോറും ഫിഞ്ചിന്റെ പേരില് തന്നെയാണ്. 2013ല് ഇംഗ്ലണ്ടിനെതിരെ 156 റണ്സാണ് ഫിഞ്ച് തകര്ത്തടിച്ചു നേടിയത്. എന്നാല് സ്വന്തം രാജ്യത്തിന്റെ കളിക്കാരനായിട്ടും വെടിക്കെട്ട് ബാറ്റിംഗിന് പേരുകേട്ട ബാറ്റ്സ്മാനായിരുന്നിട്ടും ഫിഞ്ചിനു പകരം ഹോഗ് തെരഞ്ഞെടുത്തത് ഹിറ്റ്മാനെയാണ്.