ന്യൂഡല്ഹി: ഇന്ത്യയില് നിന്നും പര്യടനം റദ്ദാക്കി നാട്ടിലെത്തിയ ദക്ഷിണാഫ്രിക്കന് താരങ്ങളോട് സ്വയം വീട്ടിനുള്ളില്ത്തന്നെ കഴിയാന് നിര്ദ്ദേശം. ദക്ഷിണാഫ്രിക്കയുടെ ആരോഗ്യമന്ത്രാലയമാണ് വിദേശ യാത്ര കഴിഞ്ഞെത്തിയ ദക്ഷിണാഫ്രിക്കന് ക്രിക്കറ്റ് ടീംമംഗങ്ങള്ക്ക് നിര്ബന്ധ കോറന്റൈന് ചെയ്യണമെന്ന നിര്ദ്ദേശം നല്കിയിരിക്കുന്നത്.
ബുധനാഴ്ചയാണ് 16 അംഗ ടീം പരിശീലകരടക്കം ദക്ഷിണാഫ്രിക്കയിലെത്തിയത്. ഭരണകൂട ത്തിന്റെ നിര്ദ്ദേശം ദക്ഷിണാഫ്രിക്കന് ക്രിക്കറ്റ് അസോസിയേഷന് ചീഫ് മെഡിക്കല് ഓഫീസര് ഷുഐബ് മന്ജ്രയാണ് ടീംമംഗങ്ങള്ക്ക് നല്കിയത്. വീട്ടിലെത്തിയ ശേഷം ഏതെങ്കിലും വിധത്തിലുള്ള ശാരീരിക ബുദ്ധിമുട്ടനുഭവപ്പെടുന്നവര് ഉടന് ക്രിക്കറ്റ് ബോര്ഡിനെ വിവരമറിയിക്കണമെന്നും നിര്ദ്ദേശത്തില് പറയുന്നു.
ഇന്ത്യയില് മൂന്ന് മത്സരങ്ങളടങ്ങുന്ന ഏകദിനപരമ്പരക്കാണ് ദക്ഷിണാഫ്രിക്കന് താരങ്ങ ളെത്തിയത്. മാര്ച്ച് 12ന് ഹിമാചലിലെ ധര്മശാലയില് നടക്കേണ്ടിയിരുന്ന ആദ്യ ഏകദിനം തന്നെ കനത്ത മഴമൂലം ഉപേക്ഷിക്കേണ്ടിവന്നു. അതിനിടെയാണ് കൊറോണ ബാധമൂലമുള്ള വിലക്കുകള് ലോകം മുഴുവന് സമാന രീതിയില് ഏര്പ്പെടുത്താന് തുടങ്ങിയത്. ഇതോടെ മത്സരങ്ങള് അടച്ചിട്ട സ്റ്റേഡിയത്തില് നടത്താമെന്ന ധാരണയിലെത്തിയെങ്കിലും പിന്നീട് താരങ്ങളുടെ സുരക്ഷയെ മുന്നിര്ത്തി പരമ്പര തന്നെ ഉപേക്ഷിക്കുകയായിരുന്നു.