ന്യൂഡല്ഹി: കൊറോണ വൈറസ് വ്യാപനം തടയാനായി രാജ്യത്ത് കര്ശന നിയന്ത്രണങ്ങള് ഏര്പ്പെടുത്തിയിരിക്കുകയാണ്. കേരളം ഉള്പ്പെടെ 19 സംസ്ഥാനങ്ങളും നാല് കേന്ദ്ര ഭരണ പ്രദേശങ്ങളും ലോക്ക് ഡൗണ് പ്രഖ്യാപിച്ചിരിക്കുകയാണ്. ഇതോടെ ഓഫീസുകളെല്ലാം അടച്ചിട്ട് വര്ക്ക് ഫ്രം ഹോം എന്ന ആശയം നടപ്പിലാക്കുകയാണ് സ്ഥാപനങ്ങള്.
വര്ക്ക് ഫ്രം ഹോമിന്റെ ഭാഗമായി വീടുകളിലെ ബ്രോഡ്ബാന്ഡ് കണക്ടിവിറ്റിയും മൊബൈല് ഇന്റര്നെറ്റും പതിവില് കൂടുതലായി ഉപയോഗിക്കുന്ന സ്ഥിതി ഉണ്ടാകും. വീഡിയോ കോണ്ഫറന്സിംഗ്, വീഡിയോ സ്ട്രീമിംഗ്, ഓണ്ലൈന് ഗെയിം എന്നിവയുടെ ഉപയോഗം കൂടുന്നതും മൊബൈല് ഇന്റര്നെറ്റ് ഉപയോഗം വര്ധിപ്പിക്കുന്നതും രാജ്യത്ത് കണക്ടിവിറ്റി പ്രശ്നങ്ങള് ഉണ്ടാക്കാന് ഇടയാക്കും.
യൂറോപ്പില് ലോക്ക് ഡൗണ് സമയത്ത് ഇത്തരം അവസ്ഥ ഉണ്ടായിട്ടുണ്ട്. നെറ്റ്വര്ക്കില് തിരക്ക് അനുഭവപ്പെട്ടതിനെ തുടര്ന്ന് ഇന്റര്നെറ്റ് കണക്ടിവിറ്റിയില് തടസങ്ങള് നേരിടാന് തുടങ്ങി. ഇന്റര്നെറ്റ് ലഭിക്കുന്നതില് തടസങ്ങള് വന്നതിനെ തുടര്ന്ന് ഉപഭോക്താക്കള് പരാതി ഉയര്ത്താന് തുടങ്ങിയതോടെ അധികൃതര് ഡേറ്റാ ഉപയോഗം പരിമിതപ്പെടുത്താനുള്ള നടപടികള് അരംഭിക്കുകയാണ് ചെയ്തത്. ഇതിന്റെ ഭാഗമായി യൂട്യൂബ്, നെറ്റ് ഫ്ളിക്സ്, ആമസോണ് പ്രൈം വീഡിയോ എന്നിവയുടെ വീഡിയോ സേവനങ്ങളെല്ലാം ദൃശ്യ നിലവാരം കുറച്ചു.
ഇന്ത്യയിലും കണക്ടിവിറ്റി പ്രശ്നം നേരിട്ടേക്കാമെന്നാണ് വിദഗ്ധര് പറയുന്നത്. ഇന്റര്നെറ്റ് ഉപയോഗം വര്ധിക്കുന്നതിലൂടെ നെറ്റ് വര്ക്കിലും പ്രശ്നങ്ങള് നേരിട്ടേക്കാമെന്നാണ് വിദഗ്ധരുടെ അഭിപ്രായം.
