ന്യൂഡല്‍ഹി: കൊറോണ മൂലം ഐപിഎല്ലും നീളുന്ന സാഹചര്യത്തില്‍ വരാനിരിക്കുന്ന ടി20 ലോകകപ്പിലും ധോണിയുടെ സാധ്യത തീരെകുറവാണെന്ന് ഗൗതം ഗംഭീര്‍. കഴിഞ്ഞ ഏകദിന ക്രിക്കറ്റ് ലോകകപ്പിന് ശേഷം ഒരു പ്രധാന കളികളിലും ഇല്ലാതിരുന്ന ധോണിയെ എങ്ങനെയാണ് പരിഗണിക്കുക എന്നാണ് മുന്‍ ഇന്ത്യന്‍ ഓപ്പണറുടെ ചോദ്യം.
ഐപിഎല്ലില്‍ ധോണിയെ മാറ്റാന്‍ ചെന്നൈ സൂപ്പര്‍കിംഗസ് ഒരിക്കലും ധൈര്യപ്പെടില്ല. പക്ഷെ കൊറോണ മൂലം ഐപിഎല്‍ മാറുന്നതോടെ ധോണിയുടെ അന്താരാഷ്ട്ര കരിയറിന് ഇനി യാതൊരു സാധ്യതയുമില്ലെന്നാണ് ഗംഭീറിന്റെ വിലയിരുത്തല്‍.
നിലവില്‍ ഇന്ത്യയുടെ മികച്ച കീപ്പറായി മാറേണ്ടയാള്‍ ലോകേഷ് രാഹുലാണ്. ധോണിയുടെ യഥാര്‍ത്ഥപകരക്കാരനായി വരേണ്ടത് മികച്ച ഒരു ബാറ്റ്‌സ്മാനാണ്. ഒപ്പം ഭാവിയിലെ നല്ല നായകനും രാഹുലാണ്. ടി20യിലും മൂന്നാം സ്ഥാനത്തോ നാലാം സ്ഥാനത്തോ ഇറക്കാന്‍ പറ്റുന്ന താരവും രാഹുല്‍ മാത്രമാണെന്നും ഗൗതം ഗംഭീര്‍ അഭിപ്രായപ്പെട്ടു.
കഴിഞ്ഞ ദിവസങ്ങളില്‍ മുന്‍ ഇന്ത്യന്‍ നായകനും മുഖ്യ സെലക്ടറുമായിരുന്ന കൃഷ്ണമാചാരി ശ്രീകാന്തും ധോണിയുടെ മടങ്ങിയെത്തല്‍ സാധ്യത കുറവാണെന്നാണ് വിലയിരുത്തിയത്. എന്നാല്‍ മുന്‍ ഇംഗ്ലണ്ട് താരം നാസര്‍ ഹുസൈന്‍ പറഞ്ഞത് വിരമിക്കാന്‍ ധോണിയെ നിര്‍ബന്ധിക്കരുതെന്നാണ്. കഴിഞ്ഞ അരനൂറ്റാണ്ടിലെ ഏറ്റവും മികച്ചതാരമാണ് ധോണിയെന്നും അത്തരം പ്രതിഭകള്‍ എപ്പോഴും ഉണ്ടാവില്ലെന്നും ഹുസൈന്‍ ചൂണ്ടിക്കാട്ടിയിരുന്നു.
