ന്യഡല്ഹി: കൊറോണ വൈറസ് ബാധിതരെ ട്രാക്ക് ചെയ്യുന്നതിനായി കേന്ദ്ര സര്ക്കാര് പുറത്തിറക്കിയ ആരോഗ്യ സേതു ആപ്ലിക്കേഷന് ഡൗണ്ലോഡ് ചെയ്തവരുടെ എണ്ണം 5 കോടി കടന്നു. 13 ദിവസത്തിനുള്ളില് അഞ്ചു കോടിയിലധികം പേര് ഡൗണ്ലോഡ് ചെയ്തതോടെ ഏറ്റവും വേഗത്തില് ഏറ്റവും അധികം പേരിലേക്കെത്തുന്ന ആപ്ലിക്കേഷനായി ആരോഗ്യ സേതു മാറി. നീതി ആയോഗ് സിഇഒ അമിതാഭ് കാന്താണ് ഇക്കാര്യം അറിയിച്ചത്.
കൊറോണ പ്രതിരോധ പ്രവര്ത്തനങ്ങള്ക്കായി ഇന്ത്യ വികസിപ്പിച്ചെടുത്ത ആപ്പ് കേവലം 13 ദിവസം കൊണ്ട് 5 കോടിയിലധികം പേര് ഡൗണ്ലോഡ് ചെയ്ത് ലോകത്തില് ഏറ്റവും കുറഞ്ഞ സമയത്തില് ഏറ്റവും അധികം പേരിലേക്കെത്തുന്ന ആപ്ലിക്കേഷനായി മാറി. അദ്ദേഹം ട്വിറ്ററില് കുറിച്ചു.
അഞ്ചു കോടി ജനങ്ങളിലേക്ക് ടെലഫോണ് എത്തിച്ചേരാന് 75 കൊല്ലവും റേഡിയോ എത്താന് 38 കൊല്ലവും ടെലവിഷന് എത്താന് 13 കൊല്ലവും ഇന്റര്നെറ്റ് നാലു കൊല്ലവും ഫേസ്ബുക്ക് 19 മാസവും ആണ് എടുത്തത്.
ഇലക്ട്രോണിക്സ്, ഇന്ഫര്മേഷന് ടെക്നോളജി മന്ത്രാലയമാണ് ഈ ആപ്പ് ഔദ്യോഗികമായി പുറത്തിറക്കിയത്. ആപ്പ് സ്റ്റോറിലും, പ്ലേ സ്റ്റോറിലും ഈ ആപ്ലിക്കേഷന് ലഭിക്കും. ഇന്ത്യയിലെ 11 ഭാഷകള് ആരോഗ്യ സേതു ആപ്പില് ലഭ്യമാണ്. മൊബൈല് നമ്പര് രജിസ്റ്റര് ചെയ്ത ശേഷം ആരോഗ്യ സേതു ആപ്പ് ഉപയോഗിച്ച് തുടങ്ങാം. ആന്ഡ്രോയ്ഡ് ഉപയോക്താക്കള്ക്ക് ആരോഗ്യ മന്ത്രാലയത്തിന്റെ ട്വീറ്റുകളും തത്സമയം ലഭിക്കുന്നതാണ്.