ന്യൂഡൽഹി : വീഡിയോ കോൺഫറൻസിന് ഉപയോഗിക്കുന്ന സൂം ആപ്പ് സുരക്ഷിതമല്ലെന്ന മുന്നറിയിപ്പുമായി കേന്ദ്ര സ൪ക്കാ൪. സര്ക്കാര് ഉദ്യോഗസ്ഥര് ഔദ്യോഗികമായ ആവശ്യങ്ങള്ക്ക് ഉപയോഗിക്കാന് പാടില്ലെന്നും മുന്നറിയിപ്പ് നൽകിയിട്ടുണ്ട്. ഇത് സംബന്ധിച്ച് കേന്ദ്ര ആഭ്യന്തര മന്ത്രാലയം സുരക്ഷാനിര്ദേശങ്ങളും പുറത്തിറക്കിയിട്ടുണ്ട്.
സൂം സംവിധാനത്തിലൂടെ സ്വകാര്യവ്യക്തികള്ക്ക് വിവര സുരക്ഷ ഉറപ്പാക്കി യോഗങ്ങള് നടതുന്നത് സംബന്ധിച്ച് കേന്ദ്ര ആഭ്യന്തരമന്ത്രാലയത്തിന് കീഴിലുളള സൈബര് ഏകോപനകേന്ദ്രം-സൈക്കോര്ഡ്(CyCorD) ആണ് മാര്ഗനിര്ദേശം പുറത്തിറക്കിയിരിക്കുന്നത്. സൂം സംവിധാനം സുരക്ഷിതമായ സംവിധാനമല്ലെന്ന് ഇന്ത്യന് കംപ്യൂട്ടര് എമര്ജന്സി റെസ്പോണ്സ് ടീം-സെര്ട്ട്-ഇന്(Cert-in) നേരത്തെ നല്കിയ മുന്നറിയിപ്പിനെ തുടര്ന്നാണ് ഈ മാര്ഗരേഖ പുറത്തിറക്കിയത്.
സുരക്ഷിതമല്ലെന്ന് കണ്ടിട്ടും സൂം ഉപയോഗിക്കാന് താല്പര്യമുള്ള സ്വകാര്യ വ്യക്തികളെ ഉദ്ദേശിച്ചാണ് മാർഗരേഖ. സൂം കോണ്ഫറന്സ് സംവിധാനത്തിലേക്ക് ബാഹ്യമായ കടന്നുകയറ്റവും ഓണ്ലൈന് യോഗത്തിലേക്ക് അനധികൃതമായി പ്രവേശിച്ച് ടെർമിനലുകൾ തകര്ക്കാനുമുള്ള ശ്രമങ്ങളും തടയാന് ലക്ഷ്യമിട്ടുള്ളതാണ് മാര്ഗരേഖ.