ലണ്ടന്‍: കൊറോണ പിടിമുറുക്കിയ സീസണ്‍ തീരും മുന്നേ സൂപ്പര്‍ താരങ്ങള്‍ക്കായി ക്ലബ്ബുകള്‍ വിലപേശിത്തുടങ്ങി. ഇംഗ്ലണ്ടിന്റെ സൂപ്പര്‍താരവും നിലവില്‍ ടോട്ടനത്തിന്റെ കരുത്തനുമായ ഹാരീ കെയിനിനെ നോട്ടമിട്ടിരിക്കുന്നത് ഇറ്റാലിയന്‍ ലീഗിലെ വമ്പന്മാരായ യുവന്റസ്സാണ്. ക്ലിസ്റ്റ്യാനോ റൊണാള്‍ഡോ കളം നിറഞ്ഞാടുന്ന തട്ടകത്തിലേക്ക് മികച്ച ഫിനിഷറായ കെയിനിനേയും എത്തിക്കാനുള്ള ശ്രമത്തിലാണ് യുവന്റസ്.
ടോട്ടനത്തിന്റെ 2019-20 സീസണില്‍ ഏറ്റവും മികച്ച നേട്ടങ്ങള്‍ ഹാരീ കെയിനിന്റെ വകയാണ്. ഇംഗ്ലണ്ടിന്റെ സ്‌ട്രൈക്കര്‍ കൂടിയായ 26 കാരന്‍ ഹാരീ കെയിനിനെ അതിനാല്‍ തന്നെ ഇറ്റലിയിലേക്ക് എത്തിക്കാനുള്ള കഠിന പരിശ്രമത്തിലാണ് യുവന്റസ്. മുന്‍ മാഞ്ചസ്റ്റര്‍ താരം വെയ്ന്‍ റൂണി ഹാരീ കെയിന്‍ ഇംഗ്ലീഷ് പ്രീമിയര്‍ ലീഗിലെ ഏറ്റവും മികച്ച താരമാണെന്ന പിന്തുണയും നല്‍കിയതിന് പുറകേയാണ് യുവന്റസിന്റെ നീക്കം മാദ്ധ്യമങ്ങള്‍ പുറത്തുവിട്ടത്. സ്പാനിഷ് ലീഗിലേക്ക് റയല്‍ മാഡ്രിഡ് ആദ്യം കെയിനിനായി ശ്രമിച്ചെങ്കിലും കൊറോണ സാമ്പത്തികമായി ക്ലബ്ബിന് പ്രശ്‌നമായതോടെ ശ്രമം പാതിവഴിയില്‍ ഉപേക്ഷിക്കുകയായിരുന്നു.
ബ്രസീലിന്റെ താരം നെയ്മറെ ഏതുവിധേനയും ക്ലബ്ബില്‍ പിടിച്ചു നിര്‍ത്താനാണ് ഫ്രഞ്ച് ലീഗിലെ കരുത്തരായ പിഎസ്ജിയുടെ ശ്രമം. കഴിഞ്ഞ തവണ ബാഴ്‌സലോണയിലേക്ക് നയ്മര്‍ തിരിച്ചുവരണമെന്ന മെസ്സിയുടെ വാക്കുകളെ പിഎസ്ജി പേടിക്കുന്നുണ്ടെന്ന വാര്‍ത്തയും മാദ്ധ്യമങ്ങള്‍ പ്രചരിപ്പിക്കുന്നുണ്ട്.
ഇതിനിടെ റയല്‍ മാഡ്രിഡ് ഈ സീസണില്‍ ടീമിനൊപ്പം ഉണ്ടായിരുന്ന ആറു കളിക്കാരെ വില്‍ക്കാനുള്ള ശ്രമത്തിലുമാണ്. ഗേരേത്ത് ബെയ്‌ലിയും ജെയിംസ് റോഡ്രിഗസും വില്‍പ്പനയുടെ പട്ടികയിലുണ്ട്.
ഇംഗ്ലീഷ് പ്രീമിയര്‍ ലീഗിലെ ആഴ്‌സണലും യുണൈറ്റഡും ഒരുമിച്ച് വലവീശിയ ഒരു താരവും വാര്‍ത്തകളില്‍ നിറയുകയാണ്. നിലവില്‍ ബാഴ്്‌സലോണക്കായി കളിക്കുന്ന ഫ്രാന്‍സിന്റെ മുന്നേറ്റതാരം ഒസുമാനേ ഡെംബലേ എന്ന 22 കാരനെയാണ് ഇംഗ്ലീഷ് ക്ലബ്ബുകള്‍ മോഹവിലയിട്ട് വാങ്ങിക്കാന്‍ നോക്കുന്നത്.
