ലോക ജനത ഇന്ന് കൊറോണ ഭീതിയിലാണ്. കൊറോണയെ പ്രതിരോധിക്കാനുള്ള തീവ്ര ശ്രമത്തിലാണ് നാമെല്ലാം. ലോക്ക് ഡൗണും മാസ്ക് ധരിക്കലും സാമൂഹിക അകലം പാലിക്കലുമൊക്കെയായി കൊറോണയ്ക്കെതിരെ പോരാടുകയാണ് ജനങ്ങള്. കൊറോണയ്ക്ക് പിന്നാലെ മഴക്കാല രോഗങ്ങളും ഭീതി വിതയ്ക്കുമെന്നാണ് ആരോഗ്യ പ്രവര്ത്തകര് നല്കുന്ന മുന്നറിയിപ്പ്.
വേനല് മഴ കൂടി ആരംഭിച്ചതോടെ ആശങ്കയിലാണ് ആരോഗ്യ വിദഗ്ധര്. രോഗഭീഷണി നിലനില്ക്കുന്നതിനാല് മതിയായ കരുതലോടെ മാത്രമെ വരും ദിവസങ്ങളെ സമീപിക്കാനാകൂ എന്നും ഇവര് മുന്നറിയിപ്പ് നല്കുന്നു. മഴക്കാല രോഗങ്ങള് തുടങ്ങുന്നതോടെ പനിയടക്കം കൊറോണ രോഗലക്ഷണങ്ങളില് പലതും തിരിച്ചറിയപ്പെടാതെ പോകുമെന്നാണ് ആരോഗ്യ പ്രവര്ത്തകര് ഭയപ്പെടുന്നത്. മഴക്കാലത്ത് നിര്ബന്ധമായും ശ്രദ്ധിക്കേണ്ട കാര്യങ്ങള് എന്തൊക്കെയാണെന്ന് നോക്കാം.
മലിനമായ കുടിവെള്ളത്തിലൂടെയും ഭക്ഷണത്തിലൂടെയും പകരുന്ന ടൈഫോയ്ഡ്, കോളറ, ഛര്ദ്ദി എന്നിവ മഴക്കാലത്ത് വ്യാപകമാകാറുണ്ട്. ഹെപ്പറ്റൈറ്റിസ് എ, ഹെപ്പറ്റൈറ്റിസ് ഇ തുടങ്ങിയ മഞ്ഞപ്പിത്ത രോഗങ്ങളും പകരുന്നത് മലിനമായ ഭക്ഷണത്തിലൂടെയാണ്. അതിനാല് ശുദ്ധജലം മാത്രം കുടിക്കാന് ഉപയോഗിക്കുകയും നല്ല ഭക്ഷണം കഴിക്കുകയും ചെയ്യണം.
തിളപ്പിച്ച വെള്ളം മാത്രം കുടിക്കാന് ശ്രദ്ധിക്കണം. വെള്ളം തിളപ്പിച്ച് ഏതാനും സെക്കന്റുകള്ക്കുള്ളില് തന്നെ കോളറയ്ക്കും മറ്റും കാരണമായ രോഗാണുക്കള് നശിക്കും.
തണുത്തതും പഴകിയതുമായ ഭക്ഷണ സാധനങ്ങള് ഒഴിവാക്കണം. നന്നായി പാകം ചെയ്ത ആഹാരം വൃത്തിയുള്ള പാത്രങ്ങളില് അടച്ച് സൂക്ഷിക്കണം. ഭക്ഷണം ചൂടോടെ ഉപയോഗിക്കുന്നതാണ് നല്ലത്.
ആഹാരം കഴിക്കുന്നതിന് മുന്പ് കൈ നന്നായി കഴുകണം. ഐസ്ക്രീം, ഐസ് ഇട്ടു വെച്ച ഭക്ഷണ സാധനങ്ങള് ഇവ ഒഴിവാക്കുന്നതാണ് നല്ലത്.
