മുംബൈ: കൃത്യതയാർന്ന യോർക്കറുകൾ കൊണ്ടും ബൗളിംഗിലെ വൈവിധ്യങ്ങൾ കൊണ്ടും ഏത് ബാറ്റ്സ്മാനേയും വെള്ളം കുടിപ്പിക്കുന്ന പേസറാണ് ഇന്ത്യയുടെ ജസ്പ്രീത് ബൂമ്ര. എന്നാൽ വാലറ്റത്ത് ഇറങ്ങുന്ന ബൂമ്ര ബാറ്റിംഗിൽ ശോഭിക്കുന്നത് ആരും ഇതുവരെ കണ്ടിട്ടില്ല. ഇക്കൂട്ടത്തിൽ സാക്ഷാൽ യുവരാജ് സിംഗും ഉണ്ടായിരുന്നു. കഴിഞ്ഞ ദിവസം ഇൻസ്റ്റഗ്രാം ലൈവിൽ യുവി ബൂമ്രയുടെ ബാറ്റിംഗിനെ കളിയാക്കുകയുണ്ടായി. എന്നാൽ ഇപ്പോൾ യുവിക്ക് ബൂമ്ര നൽകിയ മറുപടി ക്രിക്കറ്റ് ലോകത്തെ തന്നെ ഞെട്ടിച്ചിരിക്കുകയാണ്.
2017ൽ ഗുജറാത്തിനു വേണ്ടി പുറത്തെടുത്ത വെടിക്കെട്ട് ബാറ്റിംഗിന്റെ വീഡിയോയാണ് ബൂമ്ര യുവിക്കായി ട്വിറ്ററിൽ പങ്കുവെച്ചിരിക്കുന്നത്. ഗോവക്കെതിരെ നടന്ന മത്സരത്തിൽ വെറും 24 പന്തിൽ നിന്നാണ് ബൂമ്ര 42 റൺസ് നേടിയത്. മത്സരത്തിൽ ഗുജറാത്ത് വിജയിച്ചു. ഈ വിജയത്തിൽ നിർണായകമായത് ബൂമ്രയുടെ പ്രകടനമായിരുന്നു.
ബൂമ്രയുടെ അവിശ്വസനീയമായ ബാറ്റിംഗ് പ്രകടനത്തിന്റെ മികവിൽ ആദ്യം ബാറ്റ് ചെയ്ത ഗുജറാത്ത് നിശ്ചിത 50 ഓവറിൽ 9 വിക്കറ്റ് നഷ്ടത്തിൽ 277 റൺസ് നേടി. എന്നാൽ മറുപടി ബാറ്റിംഗിൽ ഗോവക്ക് 199 റൺസ് നേടാനെ കഴിഞ്ഞുള്ളു. ഗുജറാത്ത് 78 റൺസിന് മത്സരം വിജയിക്കുകയും ചെയ്തു.
On popular demand (mostly by @YUVSTRONG12), here’s presenting, Jasprit Bumrah’s match winning knock of 2017! pic.twitter.com/gnaSrZUOWn
— Jasprit Bumrah (@Jaspritbumrah93) April 28, 2020
അതേസമയം, കഴിഞ്ഞ ഐപിഎൽ സീസണിൽ യുവരാജും ബൂമ്രയും മുബൈ ഇന്ത്യൻസ് ടീമിൽ ഒരുമിച്ചു കളിച്ചവരാണ്. മുംബൈയുടെ തുറുപ്പു ചീട്ടായ ബൂമ്ര ഇതുവരെ 77 മത്സരങ്ങളിൽ നിന്നും 82 വിക്കറ്റുകൾ വീഴ്ത്തിയുട്ടുണ്ട്. എന്നാൽ, കഴിഞ്ഞ സീസണിൽ മുംബൈക്ക് വേണ്ടി തിളങ്ങാൻ യുവിക്ക് സാധിച്ചതുമില്ല.