മാഞ്ചസ്റ്റര്‍: യൂറോപ്പിലെ എല്ലാ ലീഗുകളും സമയക്രമത്തിനുള്ളില്‍ പൂര്‍ത്തിയാക്കാനുറച്ചുതന്നെ യുവേഫാ നീങ്ങുകയാണ്. ഇതിനിടെ ഫ്രാന്‍സും ഇറ്റലിയും നെതര്‍ലാന്റ്‌സും ഉടനൊന്നും ലീഗുകള്‍ ആരംഭിക്കേണ്ടെന്ന തീരുമാനിച്ചത് കണക്കിലെടുക്കുന്നില്ലെന്നും യുവേഫ വക്താവ് അറിയിച്ചു. എന്നാല്‍ ഫിഫ ആരോഗ്യവിഭാഗം എതിരഭിപ്രായം പ്രകടിപ്പിച്ചു കഴിഞ്ഞു. ലീഗുകളുടെ സമയക്രമം കഴിഞ്ഞ ദിവസമാണ് മെയ് മാസം 25നുള്ളിലറിയിക്കണമെന്ന നിര്‍ദ്ദേശം എല്ലാ യൂറോപ്പ്യന്‍ രാജ്യങ്ങളിലേയും ഫുട്‌ബോള്‍ ഫെഡറേഷനുകളെ യുവേഫ അറിയിച്ചത്.
ഫിഫയുടെ ആരോഗ്യ വിഭാഗം ചെയര്‍മാന്‍ മൈക്കിള്‍ ഡൂഹിയുടെ അഭിപ്രായത്തിന് കടകവിരുദ്ധമായ അഭിപ്രായമാണ് യുവേഫ മേധാവി ടിം മേടറുടെ ഭാഗത്തുനിന്നും ഉണ്ടായിരിക്കുന്നത്. അടുത്ത സെപ്തംബര്‍ അവസാനം വരെ യൂറോപ്പിലെ എന്നല്ല ഒരു രാജ്യത്തേയും ഫുട്‌ബോള്‍ മത്സരങ്ങള്‍ നടത്തുന്നതിലര്‍ത്ഥമില്ലെന്നായിരുന്നു ഫിഫയുടെ നിലപാട്. വിവിധ രാജ്യങ്ങളില്‍ നിന്നും വരേണ്ട താരങ്ങള്‍ അവരുടെ വ്യക്തിഗത ആരോഗ്യം, അതാത് രാജ്യത്തെ നിലവിലെ സാമൂഹിക സ്ഥിതി, കളിക്കാന്‍ പോകുന്ന രാജ്യത്തെ പൊതു ആരോഗ്യനിലവാരം എല്ലാം കണക്കിലെടുക്കുമ്പോള്‍ കളികള്‍ സെപ്തംബറിന് ശേഷമായിരിക്കും നടക്കുകയെന്നും ഫിഫ ആരോഗ്യവിഭാഗം മേധാവി കഴിഞ്ഞ ദിവസം ചൂണ്ടിക്കാട്ടിയിരുന്നു.
