ലണ്ടന്‍: ലോക ബാഡ്മിന്റണ്‍ ചാമ്പ്യന്‍ഷിപ്പ് 2021ല്‍ നടത്താന്‍ നിശ്ചയിച്ച സമയം മാറ്റി. ടോക്കിയോ ഒളിമ്പിക്‌സ് നീട്ടിയ പശ്ചാത്തലത്തിലാണ് ബാഡ്മിന്റണ്‍ മത്സരങ്ങളും നീട്ടാന്‍ തീരുമാനിച്ചത്. ആദ്യം തീരുമാനിച്ച 2021 ആഗസ്റ്റ് മാസത്തിലെ ചാമ്പ്യന്‍ഷിപ്പ് നവംബര്‍ അവസാനവും ഡിസംബര്‍ ആദ്യവുമായിട്ടാണ് നടക്കുക. ലോക ബാഡ്മിന്റണ്‍ ഫെഡറേഷനും സ്‌പെയിന്‍ ബാഡ്മിന്റണ്‍ അസോസിയേഷനും സംയുക്തമായാണ് ചാമ്പ്യന്‍ഷിപ്പ് മാറ്റം അറിയിച്ചത്. സ്‌പെയിനിലെ ഹുലേവയിലെ കരോലീനാ മാറിന്‍ സ്‌റ്റേഡിയത്തിലാണ് മത്സരങ്ങള്‍ തീരുമാനിച്ചിരിക്കുന്നത്.
‘2020ല്‍ ഇനി ലോക ബാഡ്മിന്റണ്‍ ചാമ്പ്യനെ അറിയാന്‍ സാധിക്കില്ലെന്നത് ബാഡ്മിന്റണ്‍ ആരാധകരെ അറിയിക്കുന്നു. 2021 നവംബര്‍ 29 മുതല്‍ ഡിസംബര്‍ 5 വരെയാണ് നിലവില്‍ പുതുക്കി നിശ്ചയിച്ചിരിക്കുന്നത്.’ ലോക ബാഡ്മിന്റണ്‍ ഫെഡറേഷന്‍ അറിയിച്ചു. നിലവിലെ ലോക ബാഡ്മിന്റണ്‍ വനിതാ ചാമ്പ്യന്‍ ഇന്ത്യയുടെ പി.വി.സിന്ധുവാണ്. ആദ്യമായാണ് ഇന്ത്യ വനിതാവിഭാഗത്തില്‍ കിരീടം ചൂടിയത്. പുരുഷവിഭാഗത്തില്‍ ജപ്പാനിലെ കെന്റോ മൊമോട്ടോയുമാണ്. 2019ല്‍ ജപ്പാന്റെ സര്‍വ്വാധിപത്യമാണ് ബാഡ്മിന്റണ്‍ വേദിയില്‍ കണ്ടത്. ലോക ചാമ്പ്യന്‍ ഷിപ്പിലെ പുരുഷ സിംഗിള്‍സും ഡബിള്‍സും വനിതാ വിഭാഗം ഡബിള്‍സും ജപ്പാന്‍ തന്നെ നേടി. ചൈനയാണ് തൊട്ടുപുറകിലുണ്ടായിരുന്നത്.
