ന്യൂഡല്‍ഹി: സൈനിക വിഭാഗങ്ങളെല്ലാം വിദേശത്തുനിന്നും ആയുധങ്ങളും മറ്റ് അനുബന്ധ ഉപകരണങ്ങളും വാങ്ങിക്കുന്നത് കുറയ്‌ക്കണമെന്ന് സംയുക്ത സേനാ മേധാവി ജനറല്‍ ബിപിന്‍ റാവത്. എല്ലാവരും മെയ് ഇന്‍ ഇന്ത്യ പദ്ധതിയിലൂടെ സാമഗ്രികള്‍ നിര്‍മ്മിക്കാന്‍ തയ്യാറാകണമെന്നും റാവത് അഭിപ്രായപ്പെട്ടു. ധാരാളം സാധനങ്ങള്‍ വിദേശത്തുനിന്നും ഇറക്കുമതി ചെയ്യുന്ന രീതി മാറ്റേണ്ട സമയം അതിക്രമിച്ചിരിക്കുന്നു. വിദേശ കമ്പനികളുടെ ഇന്ത്യയിലെ യൂണിറ്റുകളില്‍ സാധനങ്ങള്‍ തയ്യാറാക്കാനുള്ള സംവിധാനം ഉടന്‍ തുടങ്ങിയേ പറ്റൂ എന്നും റാവത് നിര്‍ദ്ദേശിച്ചു.
‘ മെയ്ക് ഇന്‍ ഇന്ത്യ എന്നത് വെറുമൊരു മുദ്രാവാക്യമല്ല;സൈനിക വിഭാഗങ്ങള്‍ അവരുടെ പൂര്‍ണ്ണ ശ്രദ്ധ അവിടേക്കാണ് നല്‍കേണ്ടത്. നമ്മളുടെ സൈന്യത്തെ ലോകം മുഴുവന്‍ സംരക്ഷിക്കാന്‍ നിയോഗിക്കപ്പെട്ടിട്ടില്ല. സ്വന്തം അതിര്‍ത്തികളും ഇന്ത്യയുടെ സമുദ്രമേഖലയും ശക്തമായി സംരക്ഷിക്കുക എന്നതാണ് ആത്യന്തിക ലക്ഷ്യം. അതിനാല്‍ ധാരാളം സാധനങ്ങള്‍ ഇറക്കുമതി ചെയ്ത് ഉപയോഗിക്കുന്നത് നിര്‍ത്തണം. അത് നമ്മുടെ സൈനിക മുന്നേറ്റത്തിന് ആവശ്യമാണെന്ന വ്യാഖ്യാനിക്കുന്നതും ശരിയല്ല’ റാവത് വ്യക്തമാക്കി.
കൊറോണ എല്ലാവരേയും ബാധിച്ചിട്ടുണ്ട്. നമ്മള്‍ കൂടുതല്‍ യാഥാര്‍ത്ഥ്യബോധത്തോടെ പെരുമാറണം. നമ്മുടെ അടിയന്തിര ആവശ്യങ്ങള്‍ മാത്രം നിലവില്‍ പരിഹരിക്കാനുള്ള ചിലവുകളിലേക്ക് ഒതുങ്ങിയേ പറ്റൂവെന്നും റാവത് ചൂണ്ടിക്കാട്ടി.
15 ലക്ഷം പേരടങ്ങുന്ന ഇന്ത്യന്‍ കരസേനയടക്കം ഉപയോഗിക്കാന്‍ പോകുന്ന ആയുധങ്ങളുടെ കാര്യത്തില്‍ വലിയൊരു മാറ്റം വരുത്താനൊരുങ്ങുന്നതായി റാവത് ചൂണ്ടിക്കാട്ടി. തദ്ദേശീയ മായ ലോകനിലവാരമുള്ള ആയുധങ്ങളിലേക്ക് രാജ്യം അതിവേഗം മാറുമെന്ന സൂചനയാണ് നല്‍കിയിരിക്കുന്നത്. ഇത് വലിയ തോതിലുള്ള ചിലവ് കുറയക്കുകയും തദ്ദേശിയ വ്യവസായങ്ങളെ ശക്തിപ്പെടുത്തുകയും ചെയ്യുമെന്ന സൂചനയാണ് സൈനിക വൃത്തങ്ങള്‍ നല്‍കുന്നത്.
