ഇന്ന് ദേശീയ ഡെങ്കിപ്പനി വിരുദ്ധ ദിനം. ഡെങ്കിപ്പനി നിയന്ത്രണത്തില് പൊതുജന പങ്കാളിത്തം അനിവാര്യം എന്ന സന്ദശത്തോടെയാണ് രാജ്യം ഇന്ന് ഡെങ്കിപ്പനി വിരുദ്ധ ദിനം ആചരിക്കുന്നത്. കൊറോണയ്ക്കെതിരെയുള്ള പ്രതിരോധ പ്രവര്ത്തനങ്ങള് ഊര്ജിതമാക്കുമ്പോഴും ഡെങ്കിപ്പനി പ്രതിരോധ പ്രവര്ത്തനങ്ങളില് വീഴ്ച്ച വരാതെ ശ്രദ്ധിക്കേണ്ടത് അത്യാവശ്യമാണ്. കൊറോണ വൈറസ് വ്യാപനത്തിനിടിയിലും ആശങ്ക ഉയര്ത്തി ഡെങ്കിപ്പനി കേസുകളും റിപ്പോര്ട്ട് ചെയ്യപ്പെടുന്നുണ്ട്.
ഈഡിസ് കൊതുകുകള് വഴി പകരുന്ന രോഗമാണ് ഡെങ്കിപ്പനി. ആര്ബോ വൈറസ് വിഭാഗത്തില് പെടുന്ന ഫ്ളാവി വൈറസുകളാണ് രോഗത്തിന് കാരണം. ഡെങ്കിപ്പനി പ്രധാനമായും മൂന്ന് തരത്തില് ഉണ്ട്. സാധാരണ വൈറല് പനി പോലെ കാണപ്പെടുന്ന ക്ലാസിക്കല് ഡെങ്കിപ്പനി, രക്തസ്രാവത്തോട് കൂടിയതും മരണ കാരണവും ആയേക്കാവുന്നതുമായ ഡെങ്കി ഹെമാറാജിക് ഫീവര്, രക്ത സമ്മര്ദ്ദവും നാഡിമിടിപ്പും തകരാറിലാക്കുന്ന ഡെങ്കീ ഷോക്ക് സിന്ഡ്രോം എന്നിവയാണവ.
രോഗാണുവാഹകരായ കൊതുക് കടിച്ച് ഏകദേശം മൂന്ന് മുതല് അഞ്ച് ദിവസത്തിനകം രോഗ ലക്ഷണങ്ങള് കണ്ടു തുടങ്ങും. കഠിനമായ പനി, അസഹ്യമായ തലവേദന, കണ്ണുകളുടെ പുറക് വശത്ത് വേദന, സന്ധികളിലും പേശികളിലും വേദന, വിട്ടുമാറാത്ത ക്ഷീണം എന്നിവയാണ് പ്രധാന രോഗലക്ഷണങ്ങള്.
കൊതുകിനെ നിയന്ത്രിക്കാന് വീടും പരിസരവും പൊതു സ്ഥലങ്ങളും വൃത്തിയായി സൂക്ഷിക്കണം. വീടിന് ചുറ്റും പരിസരങ്ങളിലും വെള്ളം കെട്ടിക്കിടന്ന് കൊതുക് പെരുകുന്നതകിനുള്ള സാഹചര്യം ഒഴിവാക്കണം. വീടിന്റെ പരിസരത്തുള്ള ചിരട്ട, ടിന് തുടങ്ങിയ സാധനങ്ങളില് വെള്ളം കെട്ടി നില്ക്കാതെ കമഴ്ത്തി ഇടണം.
വെള്ളം സൂക്ഷിക്കുന്ന സംഭരണികളെല്ലാം അടച്ചു സൂക്ഷിക്കണം. കിണറുകള് ക്ലോറിനേറ്റ് ചെയ്യണം. ഡെങ്കിപ്പനി ബാധിച്ചയാളെ കൊതുകു വലയ്ക്കുള്ളില് കിടത്താന് ശ്രദ്ധിക്കണം. ഇതുവഴി മറ്റുള്ളവരിലേക്ക് രോഗ വ്യാപിക്കുന്നത് തടയാനാകും. വീടിന് പുറത്ത് കിട്ടുന്നത് ഒഴിവാക്കണം. കൈകളും കാലുകളും നന്നായി മൂടുന്ന വസ്ത്രം ധരിക്കാന് ശ്രദ്ധിക്കണം. ചെറിയ പനി ആണെങ്കിലും വൈദ്യ സഹായം തേടാന് ശ്രദ്ധിക്കണം. ഡെങ്കിപ്പനി ബാധിച്ചയാള്ക്ക് പൂര്ണ വിശ്രമം ആവശ്യമാണ്. ധാരാളം വെള്ളം കുടിക്കണം.