ഇസ്ലാമാബാദ്: കശ്മീര്‍ വിഷയത്തില്‍ വീണ്ടും പ്രകോപനപരമായ പരാമര്‍ശം നടത്തി മുന്‍ പാകിസ്താന്‍ ക്രിക്കറ്റ് താരം ഷഹീദ് അഫ്രീദി. അടുത്ത തവണ പാകിസ്താന്‍ സൂപ്പര്‍ ലീഗില്‍ കശ്മീരിന്റെ പേരില്‍ ഒരു ടീമിനെ ഉള്‍പ്പെടുത്തണമെന്ന് അഫ്രീദി ആവശ്യപ്പെട്ടു. അടുത്തിടെ പാക് അധീന കശ്മീരിലെത്തിയ അഫ്രീദി ഇന്ത്യക്കെതിരെയും പ്രധാനമന്ത്രി നരേന്ദ്ര മോദിക്കെതിരെയും വിവാദ പ്രസ്താവനകള്‍ നടത്തിയിരുന്നു. ഇതിനു പിന്നാലെയാണ് വീണ്ടും പ്രകോപനപരമായ പരാമര്‍ശം നടത്തി അഫ്രീദി രംഗത്തെത്തിയിരിക്കുന്നത്.
2021ല്‍ താന്‍ കളി അവസാനിപ്പിക്കുമെന്നും അതിനാല്‍ കശ്മീരിന്റെ പേരില്‍ ഒരു ടീമിനെ പിഎസ്എല്ലില്‍ ഉള്‍പ്പെടുത്തണമെന്നുമാണ് അഫ്രീദി പാകിസ്താന്‍ ക്രിക്കറ്റ് ബോര്‍ഡിനു മുന്നില്‍ ആവശ്യപ്പെട്ടിരിക്കുന്നത്. അത്തരത്തില്‍ ഒരു ടീമിനെ നയിക്കണമെന്ന് ആഗ്രഹമുണ്ടെന്നും അഫ്രീദി അറിയിച്ചു.
‘അടുത്ത തവണ പാകിസ്താന്‍ സൂപ്പര്‍ ലീഗ് ആരംഭിക്കുമ്പോള്‍ കശ്മീരിന്റെ പേരില്‍ ഒരു ടീമിനെക്കൂടി ഉള്‍പ്പെടുത്തണം. എന്റെ അവസാന വര്‍ഷത്തില്‍ കശ്മീരില്‍ നിന്നുള്ള ടീമിനെ നയിക്കണമെന്ന് ആഗ്രഹമുണ്ട്. അടുത്ത ഫ്രാഞ്ചൈസിയുടെ പേര് കശ്മീര്‍ എന്നായിരിക്കണമെന്ന് ഞാന്‍ പാക് ക്രിക്കറ്റ് ബോര്‍ഡിനോട് ആവശ്യപ്പെടുകയാണ്’. അഫ്രീദി പറഞ്ഞു.
അതേസമയം, കഴിഞ്ഞ ദിവസം ഇന്ത്യക്കെതിരെ അഫ്രീദി നടത്തിയ പരമാര്‍ശത്തിനെതിരെ ഇന്ത്യന്‍ താരങ്ങള്‍ രംഗത്തെത്തിയിരുന്നു. രാജ്യത്തിന് വേണ്ടി കളിച്ച ഒരു ഉത്തരവാദിത്വപ്പെട്ട ഇന്ത്യക്കാരനെന്ന നിലയില്‍ അഫ്രീദിയുടെ വാക്കുകള്‍ ഒരിക്കലും അംഗീകരിക്കാനാകില്ലെന്ന് യുവരാജ് സിംഗ് പറഞ്ഞു. അഫ്രീദിയുമായി ഒരു ബന്ധവുമില്ലെന്നാണ് ഹര്‍ഭജന്‍ സിംഗ് പ്രതികരിച്ചത്. അഫ്രീദി, ഇമ്രാന്‍, ബജ്വ എന്നിവരെ കോമാളികള്‍ എന്ന് ഗംഭീര്‍ വിശേഷിപ്പിച്ചപ്പോള്‍ കശ്മീര്‍ അന്നും ഇന്നും എന്നും തങ്ങളുടേതാണെന്നായിരുന്നു ശിഖര്‍ ധവാന്റെയും സുരേഷ് റെയ്‌നയുടെയും മറുപടി.
