മുംബൈ: കനത്ത മഴയും കാറ്റും സൃഷ്ടിച്ച ഭീതിയില്‍ നിന്നും മുംബൈ നിവാസികള്‍ക്ക് തെല്ലൊരു ആശ്വാസം.മൂന്നു പേരുടെ ജീവനെടുത്ത നിസര്‍ഗ ചുഴലിക്കാറ്റ് ശക്തികുറഞ്ഞ് റായഗഡ് മേഖലയിലേക്ക് നീങ്ങുന്നതായാണ് വിവരം. രണ്ടു പുരുഷന്മാരും ഒരു സ്ത്രീയുമാണ് മരണപ്പെട്ടത്. മണിക്കൂറില്‍ 150 കിലോമീറ്റര്‍ വേഗതയില്‍ വീശിയടിച്ച ചുഴലിക്കാറ്റ് തീരപ്രദേശത്ത് ആഞ്ഞടിച്ചു. ദേശീയ ദുരന്ത നിവാരണ സേന ആളുകളെ മാറ്റിയതിനാലാണ് കനത്ത നാശനഷ്ടം ഉണ്ടാകാതിരുന്നതെന്ന് സംസ്ഥാന ഭരണകൂടം അറിയിച്ചു. ഇന്നലത്തെ കനത്ത മഴയില്‍ വിമാനത്താവളത്തിന്റെ പ്രവര്‍ത്തനം നിര്‍ത്തിവയ്‌ക്കുകയും 256 ശ്രമിക് ട്രെയിനുകള്‍ റദ്ദാക്കി. ഗുജറാത്ത് തീര പ്രദേശങ്ങളില്‍ നിന്നും 67000 പേരെ ഒഴിപ്പിച്ചതായി ദുരന്ത നിവാരണ സേന അറിയിച്ചു.
72 വര്‍ഷങ്ങള്‍ക്ക് ശേഷമാണ് മുംബൈ നഗരം ഒരു ചുഴലിക്കാറ്റിനെ അഭിമുഖീകരിക്കുന്നത്. കൊറോണ മഹാമാരിയില്‍ വീര്‍പ്പുമുട്ടുന്നതിനിടെ രണ്ടു ദിവസമായി പെയ്യുന്ന കനത്ത മഴയും കാറ്റും സാധാരണ ജീവിതം ദു:സ്സഹമാക്കി. നിലവില്‍ മഹാരാഷ്‌ട്രയുടെ വടക്കന്‍ തീരപ്രദേശമായ റായ്ഗഡിലേക്കാണ് ചുഴലിക്കാറ്റിന്റെ ദിശമാറിയത്. മുംബൈയില്‍ നിന്നും 75 കിലോമീറ്റര്‍ ദൂരേയ്‌ക്ക് കാറ്റ് മാറിപ്പോയതായാണ് സൂചന. തീരപ്രദേശത്ത് 8 അടി ഉയരത്തില്‍ വരെ തിരകള്‍ സൃഷ്ടിച്ചാണ് ഇന്നലെ കാറ്റ് വീശിയത്. കനത്ത മഴ 38 മില്ലീമീറ്റര്‍ എന്ന തോതിലാണ് രേഖപ്പെടുത്തിയത്. അലിബാഗിലും പാല്‍ഖറിലും വീടുകളുടേയും സ്ഥാപനങ്ങളുടേയും ദുര്‍ബലമായ മേല്‍ക്കൂരകള്‍ കാറ്റില്‍ പറന്നുപോയി. പലയിടത്തും മരങ്ങളും വൈദ്യുതി പോസ്റ്റുകളും തകര്‍ന്നു.
