ദുബായ്: കായിക രംഗത്തെ വംശീയവിദ്വേഷത്തിനെതിരെ അന്താരാഷ്ട്ര ക്രിക്കറ്റ് കൗണ്സില് രംഗത്ത്. ക്രിക്കറ്റെന്നാല് വ്യത്യസ്തതകളുടെ ലോകമാണെന്നും ഇതില് വംശീയതയ്ക്കും വര്ണ്ണവെറിക്കും യാതൊരു സ്ഥാനവുമില്ലെന്നും ഐ.സി.സി അറിയിച്ചു.
വര്ണ്ണവെറിക്കെതിരെ 2019ലെ ഐസിസി ലോകകപ്പിന്റെ ഫൈനല് മത്സരത്തിന്റെ ദൃശ്യങ്ങളുള്പ്പെടുത്തിയാണ് ഐ.സി.സി സന്ദേശം നല്കുന്നത്. ഇംഗ്ലണ്ട് കിരീടം നേടിയ മത്സരത്തിലെ വീഡിയോക്കൊപ്പം വ്യത്യസ്തതകളില്ലെങ്കില് ക്രിക്കറ്റ് ഒന്നുമല്ലെന്ന സന്ദേശവും ഉള്പ്പെടുത്തിയിട്ടുണ്ട്. ട്വിറ്ററിലൂടെയാണ് ഐ.സി.സി സന്ദേശം നല്കിയത്. 18 സെക്കന്റാണ്
വീഡിയോയുടെ ദൈര്ഘ്യം.
ലോകകപ്പ് കലാശപോരാട്ടത്തിലെ നിര്ണ്ണായക ഓവര് ബൗള് ചെയ്യാന് ഇംഗ്ലണ്ടിന്റെ ആഫ്രിക്കന് വംശജനായ താരം ജൊഫ്ര ആര്ച്ചറാണ് നിയോഗിക്കപ്പെട്ടത്. ഇംഗ്ലണ്ടിന് ചരിത്രത്തിലാദ്യമായി ലോകകിരീടം നേടിക്കൊടുത്ത ആ പരിശ്രമത്തിലൂടെ വംശീയതയ്ക്ക് സ്ഥാനമില്ലെന്ന സന്ദേശമാണ് ഐ.സി.സി നല്കുന്നത്.
വെസ്റ്റിന്ഡീസ് താരം ക്രിസ് ഗെയില് അടക്കം നിരവധി താരങ്ങളാണ് വംശീയവിദ്വേഷം ക്രിക്കറ്റിലും അനുഭവിക്കുന്നു എന്ന ആരോപണവുമായി രംഗത്തെത്തിയിരുന്നത്. അമേരിക്കയില് കറുത്തവര്ഗ്ഗക്കാരന്രെ മരണത്തെ തുടര്ന്നുള്ള പ്രതികരണമാണ് കായികലോകത്തു നിന്നും വ്യാപകമായി ഉയര്ന്നത്. വെസ്റ്റിന്ഡീസ് മുന് നായകന് ഡാരെന് സമി ഐ.സി.സിയോട് വംശീയ പ്രശ്നങ്ങള്ക്കെതിരെ പ്രസ്താവന നല്കണമെന്ന് ആവശ്യപ്പെട്ടിരുന്നു.
