ന്യൂഡല്ഹി : ഉപയോക്താക്കള്ക്കായി പുതിയ ഫീച്ചര് തുടങ്ങാനുള്ള പരീക്ഷണത്തിലാണ് മൈക്രോ ബ്ലോഗിംഗ് ആപ്പായ ട്വിറ്റര്. ലേഖനങ്ങളും മറ്റും റീ ട്വീറ്റ് ചെയ്യുന്നതിന് മുന്പായി തുറന്ന് വായിക്കാന് ഉപയോക്താവിനെ അനുവദിക്കുന്ന ഫീച്ചറാണ് ട്വിറ്റര് തയ്യാറാക്കുന്നത്. ഉടന് തന്നെ ഈ ഫീച്ചര് ആന്ഡ്രോയിഡില് ലഭ്യമാകുമെന്ന് ബന്ധപ്പെട്ട വൃത്തങ്ങള് അറിയിച്ചു.
ഉപയോക്താക്കള്ക്കിടയില് ചര്ച്ചകള് പ്രോത്സാഹിപ്പിക്കുന്നതിന്റെ ഭാഗമായാണ് ട്വിറ്റര് പുതിയ ഫീച്ചറിന് രൂപം നല്കുന്നത് എന്നാണ് വിവരം. പുതിയ ഫീച്ചര് സംബന്ധിച്ച വിവരം ട്വിറ്റര് തന്നെയാണ് ട്വിറ്ററിലൂടെ അറിയിച്ചത്. ഒരു ആര്ട്ടിക്കിള് പങ്കുവെക്കുന്നതിലൂടെ വലിയ ഒരു ചര്ച്ചക്ക് തിരികൊളുത്തുകയാണ് നാം ചെയ്യുന്നത്. അതുകൊണ്ട് തന്നെ ലേഖനങ്ങള് പങ്കുവെക്കുന്നതിന് മുന്പ് അത് തുറന്നു വായിക്കാന് നിങ്ങള് ആഗ്രഹിച്ചേക്കാം. അറിവ് നിറഞ്ഞ ചര്ച്ചകള് പ്രോത്സാഹിപ്പിക്കുന്നതിനായി പുതിയ ഫീച്ചര് ഞങ്ങള് പരീക്ഷിക്കുകയാണ്. റീ ട്വിറ്റ് ചെയ്യുന്നതിന് മുന്പായി പ്രസ്തുത ലേഖനം തുറന്നുവായിക്കാന് നിങ്ങള് ആഗ്രഹിക്കുന്നുണ്ടോ എന്ന് ഞങ്ങള് ചോദിക്കും – ട്വിറ്റര് വ്യക്തമാക്കി.
വ്യാജ വീഡിയോകള് പ്രചരിപ്പിക്കുന്നത് തടയാന് പുതിയ ഫീച്ചര് കൊണ്ടുവരുന്നത് സംബന്ധിച്ച് ട്വിറ്റര് നേരത്തെ അറിയിച്ചിരുന്നു. ഇതിന് പിന്നാലെയാണ് ആര്ട്ടിക്കിള് തുറന്നു വായിക്കാന് ഉപയോക്താവിനെ അനുവദിക്കുന്ന ഫീച്ചര് തയ്യാറാക്കുന്ന വിവരം ട്വിറ്റര് പുറത്തുവിട്ടത്. വ്യാജ വാര്ത്തകളും സന്ദേശങ്ങളും പ്രചരിക്കുന്നത് തടയുന്നതിനായുള്ള ഫീച്ചറുകളും ട്വിറ്റര് അധികം വൈകാതെ ആരംഭിക്കുമെന്നാണ് വിവരം.