ബേണ്‍: അന്താരാഷ്‌ട്ര ഫുട്‌ബോള്‍ രംഗത്ത് വിപ്ലവകരമായ തീരുമാനവുമായി ഫിഫ. ഒരു അന്താരാഷ്‌ട്ര താരത്തിന് സീസണില്‍ മൂന്ന് ക്ലബ്ബുകളില്‍ കളിക്കാനുള്ള അനുമതി നല്‍കാനാണ് പുതിയ തീരുമാനം. കൊറോണ പരിതസ്ഥിതിയില്‍ താരങ്ങളുടെ യാത്രാ പ്രശ്‌നങ്ങളും ടൂര്‍ണ്ണമെന്റുകളുടെ നടത്തിപ്പിലെ അനിശ്ചിതത്വങ്ങളുമാണ് പുതിയ തീരുമാനം എടുക്കാന്‍ പ്രേരിപ്പിച്ച ഘടകം. നിലവില്‍ മികച്ച ക്ലബ്ബുകളില്‍ സ്ഥാനം കിട്ടാത്ത കളിക്കാര്‍ക്ക് അവരുടെ താല്‍പ്പര്യവും സാധ്യതയും അനുസരിച്ച് ക്ലബ്ബ് മാറാന്‍ സാധിക്കുന്നതാണ് നിയമഭേദഗതി.
താരങ്ങളുടെ സാധ്യത വിപൂലീകരിക്കുന്നതോടൊപ്പം ക്ലബ്ബുകള്‍ക്ക് നിലവിലെ സീസണ്‍ തീരുംമുന്നേ പുതിയ താരങ്ങളെ കൈമാറുന്ന നടപടികള്‍ ആരംഭിക്കാമെന്നും അറിയിച്ചു കഴിഞ്ഞു. 2019-20 സീസണില്‍ നിലവിലെ ടീമംഗങ്ങളെ ഉപയോഗിച്ച് കളിക്കുന്നതോടൊപ്പം പുതിയ താരങ്ങളെ അടുത്ത സീസണിലേക്ക് എടുക്കാമെന്നാണ് ഫിഫ നിര്‍ദ്ദേശം.
ഈ മാസം ആദ്യ ആഴ്ചയോടെ രണ്ടു സുപ്രധാന ലീഗുകള്‍ സജീവമായത് ആരാധകരെ ആവേശത്തിലാക്കിക്കഴിഞ്ഞു. ജര്‍മ്മന്‍ ലീഗായ ബുന്ദേസ്ലീഗയക്ക് പുറമേ സ്പാനിഷ് ലീഗായ ലാ ലീഗയും ആരംഭിച്ചു കഴിഞ്ഞു. ഈ മാസം അവസാനത്തോടെ ഇംഗ്ലീഷ് പ്രീമിയര്‍ ലീഗും ഇറ്റാലിയന്‍ ലീഗായ സീരി ഏയും ആരംഭിക്കും.
