ക്രൈസ്റ്റ്ചര്ച്ച്: ദേശീയ ടീമിന്റെ പരിശീലക സ്ഥാനം വിട്ട് പ്രാദേശിക ക്ലബ്ബില് ചേക്കേറി പീറ്റര് ഫുള്ട്ടണ്. ന്യൂസിലാന്റിന്റെ ബാറ്റിംഗ് കോച്ച് എന്ന സുപ്രധാന ചുമതലയാണ് ഫുള്ട്ടണ് ഒഴിവാക്കിയത്. കാന്റര്ബെറി പുരുഷ ക്രിക്കറ്റ് ടീമിന്റെ പരിശീലകനായിട്ടാണ് ഫുള്ട്ടണ് ചുവടുമാറ്റം നടത്തിയിരിക്കുന്നത്.
2019 ആഗസ്റ്റിലാണ് ഫുള്ട്ടണെ ദേശീയ ടീമിലേക്ക് എടുത്തത്. ന്യൂസിലാന്റിന്റെ തുടര്ന്നുള്ള രണ്ട് വിദേശ പര്യടനത്തിലും നാട്ടിലെ രണ്ടു പരമ്പരകളിലും ഫുള്ട്ടണ് ടീമിനൊപ്പം ഉണ്ടായിരുന്നു. ശ്രീലങ്കയിലേക്കും ഓസ്ട്രേലിയയിലേക്കും കിവീസ് ടീമിനൊപ്പം ഉണ്ടായിരുന്ന ഫുള്ട്ടണ് ഇംഗ്ലണ്ടും ഇന്ത്യയും ന്യൂസിലന്റില് എത്തിയപ്പോഴും ടീമിനെ പരിശീലിപ്പിച്ചിരുന്നു.
ദേശീയ ടീമിന്റെ പരിശീലകന് എന്നത് തികച്ചും വലിയ ബഹുമതിയാണ്. എന്നാല് കാന്റര്ബറി ക്രിക്കറ്റ് ക്ലബ്ബിന്റെ അവസരം നിലവില് തളളിക്കളയാനാകില്ലെന്നാണ് ഫുള്ട്ടണ് പറയുന്നത്. സ്വന്തം നാട്ടിലെ പ്രാദേശിക ടീമിനൊപ്പം നില്ക്കുകയും കുടുംബത്തോടൊപ്പം കൂടുതല് സമയം ലഭിക്കുമെന്നതുമാണ് മുഖ്യകാരണമായി ഫുള്ട്ടണ് ചൂണ്ടിക്കാണിക്കുന്നത്. എന്നാല് മുഖ്യപരിശീലകനായി ദേശീയ ടീം പരിഗണിക്കാത്തതിന്റെ പരിഭവമാണ് ടീം വിടുന്നതിന് കാരണമായി ക്രിക്കറ്റ് ലോകം വിലയിരുത്തുന്നത്.
