ശരീരത്തിന്റെ പ്രതിരോധ ശക്തിയ്ക്ക് സഹായിക്കും വിധമുള്ള ആഹാരത്തിനാണ് ആരോഗ്യ വിദഗ്ധർ പ്രാധാന്യം നൽകുന്നത് . ദിവസം മുഴുവൻ മനുഷ്യരുടെ ഏകാഗ്രതയും ശ്രദ്ധയും നിലനിർത്തുന്നതിൽ ഭക്ഷണക്രമീകരണം അത്യന്താപേക്ഷിതമാണ്. ഒരു ശരാശരി മനുഷ്യന്റെ ഉറക്കം, വ്യായാമം തുടങ്ങിയവ ഇതിൽ സ്വാധീനം ചെലുത്തുന്നുണ്ടെങ്കിലും ഭക്ഷണത്തിന്റെ പങ്ക് വളരെ വലുതാണ്.
ഉയർന്ന ഫൈബർ അടങ്ങിയിരിക്കുന്ന ഭക്ഷണങ്ങളായ പച്ചക്കറികൾ, പഴങ്ങൾ, ധാന്യങ്ങൾ, പരിപ്പ്, ബീൻസ് എന്നിവ ഒരു വ്യക്തിയുടെ ഏകാഗ്രതയ്കും പ്രചോദനത്തിനും മികച്ചതാണ്. രക്തത്തിലെ പഞ്ചസാരയുടെ അളവ് നിലനിർത്തുന്നതിനാൽ ഇവ ഊർജ്ജം നിലനിർത്താൻ സഹായിക്കുന്നു. ചീര പോലുള്ള ഇലക്കറികളിൽ പൊട്ടാസിയം അടങ്ങിയിട്ടുണ്ട്. ഇവ തലച്ചോറിന്റെ പ്രവർത്തനം വർധിപ്പിക്കുന്നു. കടൽ ഭക്ഷണങ്ങൾ, ധാന്യ വർഗ്ഗങ്ങൾ തുടങ്ങിയവ ഓർമ്മ ശക്തി കൂട്ടുന്നു. ഗോതമ്പ്, പയർ വർഗ്ഗങ്ങൾ, ഇലക്കറികൾ എന്നിവയിൽ വിറ്റാമിൻ ബി അടങ്ങിയിരിക്കുന്നു. ഇത് മനുഷ്യരുടെ തലച്ചോറിനെയും നാഡിവ്യവസ്ഥയേയും മികച്ച രീതിയിൽ പ്രവർത്തിപ്പിക്കുന്നു.
കോവിഡ് കാലമായതുകൊണ്ടു മുതിർന്നവരും കുട്ടികളും എല്ലാവരും വീട്ടിൽ തന്നെയാണ്. അതുകൊണ്ടുതന്നെ പതിവ് ഭക്ഷണ രീതിയിൽ ഒരുപാട് മാറ്റങ്ങൾ വന്നിട്ടുണ്ട്.
വറുത്ത ഭക്ഷണങ്ങൾ, കൊഴുപ്പു നിറഞ്ഞ ഭക്ഷണങ്ങൾ, മധുരപ്പലഹാരങ്ങൾ എന്നിവ ഇപ്പോൾ ധാരാളം കഴിക്കുന്ന സമയമാണ്. പല തരത്തിലുള്ള പാചക പരീക്ഷണങ്ങളും, പുറത്തു നിന്ന് ഓർഡർ ചെയ്തു കഴിക്കുന്നതും ഇന്ന് ഒരു പതിവാണ്.
ഇത്തരം ഭക്ഷണ രീതികൾ മനുഷ്യരുടെ ഏകാഗ്രത, അറിവ്, ബുദ്ധി എന്നിവയിൽ ചെലുത്തുന്ന സ്വാധീനം വളരെ വലുതാണ്. സാറ്റുറേറ്റഡ് ഫുഡ് അഥവാ പൂരിത കൊഴുപ്പു നിറഞ്ഞ ഭക്ഷണ പദാർത്ഥങ്ങൾ ഹൃദയസംബന്ധമായ രോഗത്തിന് കാരണമാക്കുന്നു. ഇവ ശരീര ഭാരം വർധിപ്പിക്കുകയും ഒടുവിൽ അമിതവണ്ണത്തിൽ കൊണ്ടെത്തിക്കുകയും ചെയ്യുന്നു. നമ്മുടെ ശരീരത്തിന് ആവശ്യമായ പോഷകം നഷ്ടപെടുന്നതിലൂടെ പ്രമേഹം, ഹൃദ്രോഗം ,ഹൃദയാഘാതം എന്നിവയ്ക്കുള്ള അപകട സാധ്യതകൾ വർധിക്കുകയും ചെയ്യുന്നു.
