ഭോപ്പാല്: മധ്യപ്രദേശിലെ സാമൂഹ്യാന്തരീക്ഷത്തിലെ മഹാമാരിയാണ് കമല്നാഥെന്ന് മധ്യപ്രദേശ് മുഖ്യമന്ത്രിയായ ശിവരാജ് സിംഗ് ചൗഹാന്. കോണ്ഗ്രസ്സ് നേതാവ് കൊറോണയേക്കാള് അപകടകാരിയാണെന്ന പ്രസ്താവനയാണ് ശിവരാജ് സിംഗ് ചൗഹാന് നടത്തിയത്. ബി.ജെ.പി സര്ക്കാര് സംസ്ഥാന ഭരണത്തിലേറിയതിന്റെ 100-ാം ദിവസം ആഘോഷിക്കുന്നതിന്റെ ഭാഗമായാണ് കോണ്ഗ്രസ്സിന്റെ മുന് മുഖ്യമന്ത്രിക്കെതിരെ ശിവരാജ് സിംഗ് ചൗഹാന് ആഞ്ഞടിച്ചത്.
‘കമല്നാഥ് മുഖ്യമന്ത്രിയായിരുന്നെങ്കില് കൊറോണയെ നേരിടുമായിരുന്നോ? ഇന്ന് മധ്യപ്രദേശില് കൊറോണയേക്കാള് വലിയ പ്രശ്നം കമല്നാഥാണ്’ ചൗഹാന് പരിഹസിച്ചു.
മധ്യപ്രദേശിലെ വിവിധ ക്ഷേമപദ്ധതികള്ക്കായി 40,000 കോടിരൂപയാണ് ബി.ജെ.പി സര്ക്കാര് നീക്കിവച്ചിരിക്കുന്നത്. കമല്നാഥ് ഇങ്ങനെ ഒരു കാര്യം ചെയ്യുമായിരുന്നോ എന്നും ചൗഹാന് ചോദിച്ചു. കോണ്ഗ്രസ്സ് നേതാവ് സംസ്ഥാനത്തെ എല്ലാ ക്ഷേമ പദ്ധതികളും നിര്ത്തലാക്കിയ വ്യക്തിയാണ്. എന്നാല് ഇത്ര പ്രതിസന്ധി ഘട്ടത്തിലും കര്ഷകരുടെ ഉത്പ്പന്നങ്ങള് വാങ്ങി വിതരണം ചെയ്യാന് ബി.ജെ.പി സര്ക്കാറിനായെന്നും ചൗഹാന് പറഞ്ഞു.
സംസ്ഥാനത്തെ കര്ഷകരെ നുണപറഞ്ഞു പറ്റിച്ച നേതാവാണ് കമല്നാഥെന്നും ചൗഹാന് കുറ്റപ്പെടുത്തി. സംസ്ഥാനം ആകെ കടത്തിലാണെന്നാണ് കോണ്ഗ്രസ്സ് കര്ഷകരെ പറഞ്ഞ് വിശ്വസിപ്പിച്ചത്. കര്ഷകര്ക്കുള്ള ഇന്ഷൂറന്സുകളൊന്നും കമല്നാഥ് അടച്ചില്ല. എന്നാല് ഞങ്ങള് അധികാരത്തിലേറിയ ശേഷം 2990 കോടി രൂപയാണ് കര്ഷകരുടെ സുരക്ഷയ്ക്കായി മാറ്റിവച്ചതെന്നും ശിവരാജ് സിംഗ് ചൗഹാന് വ്യക്തമാക്കി.
സംസ്ഥാനത്തെ സ്ത്രീകളുടെ സ്വാശ്രയ സംഘങ്ങള്ക്കായി നിരവധി ക്ഷേമ പദ്ധതികളാണ് ആവിഷ്ക്കരിച്ചിരിക്കുന്നത്. കമല്നാഥ് കോണ്ട്രാക്ടര്മാരെ സംരക്ഷിച്ചപ്പോള് ഞങ്ങള് സംരക്ഷിക്കുന്നത് സ്ത്രീസമൂഹത്തേയാണ്. അവര്ക്കായി 700 കോടിഅനുവദിച്ചെന്നും ചൗഹാന് പറഞ്ഞു.